Украина аллақачон АҚШдан кассетали ўқ-дориларни олган, бироқ улардан ҳали жанг майдонида фойдаланмаган. Бу ҳақда “Таврия” оператив-стратегик гуруҳи қўмондони, бригада генерали Александр Тарнавский CNN’га маълум қилди.
У бу турдаги ўқ-дорилар уруш жараёнига катта таъсир кўрсатишига ишонч билдирди. Аввалроқ Украина мудофаа вазири Алексей Резников ҳам кассетали бомбалар уруш қоидасини ўзгартириши, улар босиб олинган ҳудудларда қўлланишини таъкидлаганди.
“Биз ҳозиргина кассетали ўқ-дориларни олдик, улардан ҳали фойдаланмадик, бироқ улар жанг майдонидаги вазиятни тубдан ўзгартириши мумкин”, — деди Тарнавский.
Расман Украина кассетали бомбалар келганини тасдиқламаган, бироқ улар аҳоли зич жойлашган ҳудудларда ишлатилмаслиги ҳақида Америкага аллақачон кафолат берган.
Украинага кассетали ўқ-дорилар берилиши
АҚШ Украинага кассетали ўқ-дорилар (ёки кассетали бомбалар) беради. У ўнлаб-юзлаб кичикроқ бомбаларни ўз ичига олган контейнерлардир. Уларни самолётдан, артиллериядан, ракета отиш мосламаларидан, денгиз қуролларидан отиш мумкин.
Кассетали ўқ-дорилар олдиндан белгиланган баландликда очилади, бу мўлжалланган нишоннинг майдонига боғлиқ бўлиб, ичидаги ўқ-дорилар белгиланган ҳудудга тақсимланади. Ўқ-дорилар бир-бирига таймер билан боғланган ва ерга яқинроқ портлайди.
Россиянинг Украинага кассетали бомбалар берилаётганига муносабати қандай?
Россия мудофаа вазирига кўра, Украинага кассетали ўқ-дорилар етказиб берилса, Россия қўшинлари Украина армиясига қарши худди шундай воситаларни қўллашга мажбур бўлади. У Америка раҳбариятининг бу қарори конфликтнинг чўзилишига таъсир қилишини таъкидлади.
Россия мудофаа вазири мамлакат “ҳар эҳтимолга қарши” кассетали бомбаларга эгалигини айтди.
Нима учун кассетали ўқ-дорилар баҳсга сабаб бўлмоқда?
Бомбалар катта майдонга тушгани сабабли улар жанговар бўлмаган ҳудудларга ҳам таҳдид солиши мумкин. Бундан ташқари, Халқаро Қизил Хоч қўмитаси маълумотларига кўра, ўқ-дориларнинг 10 фоиздан 40 фоизгача бўлган қисми нобуд бўлади ва портламаган ўқ-дорилар тинч аҳоли учун йиллар ва ҳатто ўнлаб йиллар давомида хавф туғдиради.
Потенциал ҳалокатли кассетали ўқ-дорилар Лаос ва Вьетнамда ишлатилганидан 50 йил ўтиб ҳамон портламай қолмоқда, бу эса мазкур қуролларни кенг миқёсда тақиқлашни талаб қилишга ундади.
Кассетали ўқлар тўғрисидаги конвенция туфайли дунёнинг аксарият мамлакатлари ушбу қуроллардан фойдаланишни аллақачон тақиқлаб қўйган, бу эса уларни захиралаш, ишлаб чиқариш ва узатишни ҳам тақиқлайди. Ушбу конвенция га 123 давлат қўшилган, аммо яна 71 давлат (хусусан, АҚШ, Украина, Россия) қўшилмаган.
Изоҳ (0)