Афина шаҳри марказида бомба портлади

Афина шаҳри марказида, Грециянинг Буюк масон ложаси биноси ёнида портловчи қурилма ишга тушди, деб хабар берди мамлакатнинг ERТ жамоат телевидениеси.

“Жабрланганлар йўқ, фақат моддий зарар етказилди. Портловчи механизм қолдиқлари топилди”, — дейилади хабарда.

Иккинчи бомба бошқариладиган портлаш натижасида зарарсизлантирилди. Воқеадан олдин огоҳлантириш қўнғироғи бўлгани айтилмоқда.

“Текширув давомида бино ичидан шубҳали қути топилди, у Портламаган бомбаларни зарарсизлантириш бошқармаси мутахассислари томонидан текширилди. Қутида портловчи мослама борлиги аниқланди ва бошқариладиган портлаш амалга оширилди”, — дейилади ERТ жамоат телевидениеси хабарида.

Масонлар ложаси биноси Ахарнон ва Сурмели кўчалари ўртасида жойлашган бўлиб, портлаш эрталаб маҳаллий вақт билан соат 06:30 да содир бўлган. Юзага келган ёнғин ўт ўчирувчилар томонидан ўчирилди.

Proto Tema газетасининг хабар беришича, портловчи қурилма қўлбола бўлиб, портлаш қуввати паст бўлган.