“Вагнер” ҳарбий техникалари кимнинг қўлида? Россия Мудофаа вазирлиги жавоб берди

Россия Мудофаа вазирлиги “Вагнер” хусусий ҳарбий кампаниясидан барча ҳарбий техника ва қуролларни олганини эълон қилди. 

Мудофаа вазирлигининг хабар беришича, Россия қуролли кучлари “режага мувофиқ” “Вагнер” бўлинмаларидан қурол ва ҳарбий техникани қабул қилишни якунлади. У  Т-90, Т-80, Т-72B3 танклари, Град ва Ураган кўп ракета тизимларини ўз ичига олган икки мингдан ортиқ техника ва қуроллардан иборат.

Россия Мудофаа вазирлиги “ўнлаб техникалар ҳеч қачон жанговар шароитларда ишлатилмаганини” илгари сурди. Қўлга киритилган барча техника ва қуроллар фронт орқасига етказилган.

23 июнь куни “Вагнер” асосчиси Евгений Пригожин ўзининг ҳарбийлаштирилган гуруҳининг ёлланма аскарлари иштирокида Москвада “адолат марши”ни эълон қилди. 

Унинг сўзларига кўра, маршнинг мақсади бошқа кўнгилли тузилмалар сингари Россия Мудофаа вазирлиги билан 1 июлгача шартнома тузиш таклиф қилинган “Вагнер”ни йўқ қилишнинг олдини олишдир.

24 июнга ўтар кечаси “Вагнер” ёлланма аскарлари Ростов-на-Донни эгаллаб олди ва жангчиларнинг бир қисми Москвага жўнаб кетди. 

24 июнь Пригожин Александр Лукашенко билан музокаралардан сўнг, ёлланма аскарлар Луганскдаги “дала лагерларига” кетаётганини эълон қилди. 

Шартномаларга кўра, Пригожин ва ёлланма аскарлар Беларусга “жўнаб кетиши” керак, аммо ҳозирча Беларусда вагнерчилар ҳаракати қайд этилмаган. Лукашенко дастлаб Пригожин Беларусдалигини айтган, кейин буни инкор этган. Мазкур хабар фонида Песков Россия президенти Кремлда “Вагнер” раҳбари билан музокара олиб борганини хабар қилган.