Украинанинг Запорожье вилоятида салкам 20 дақиқа давомида ҳаво ҳужумидан огоҳлантириш тревогаси янгради. Вилоят марказига номаълум турдаги қурол билан ҳужум қилинди. Бу ҳақда “Ukrinform” хабар берди.
Запорожье мерининг биринчи ўринбосари Александр Власюкнинг айтишича, Россия ҳарбийлари қайси қуролдан зарба бергани ҳозирча номаълум. Портлаш оқибатида олти киши жароҳатланган, уч киши касалхонага ётқизилган (улар орасида бола ҳам бор).
“Текширув ишлари олиб борилмоқда, ҳанузгача номаълум бўлган ҳарбий объект қолдиқлари ўрганилмоқда. Ҳозирда олти нафар жароҳатланганлар ҳақида маълумот бор, уларнинг уч нафари касалхонага ётқизилган, жумладан, кичкина бола ҳам. У вилоят болалар касалхонасида кўрикдан ўтказилмоқда”, — дейди Власюк.
Украина Ички ишлар вазирлиги беш нафар жабрланган (улардан бир нафари бола) ҳақида маълум қилди ва жароҳатланганларга тиббий ёрдам кўрсатилиб, тез ёрдам машиналари томонидан касалхонага ётқизилганини қайд этди.
“Фавқулодда вазиятлар хизмати психологлари воқеа жойида иш олиб борди ва одамларга ёрдам берди”, — дейилади хабарда.
Запорожье вилоят клиник болалар шифохонаси директори Юрий Борзенконинг айтишича, портлаш оқибатида 1 ёшдан 17 ёшгача бўлган беш нафар бола жароҳатланган.
“Барча болаларнинг аҳволи оғир эмас, улар юра олади. Яралар бор, юмшоқ тўқималарда кўкаришлар қайд этилган”, — деди у.
Изоҳ (0)