Олий таълим, фан ва инновациялар вазирлиги Ат-Термизий номидаги халқаро университетга олий таълим хизматларини кўрсатиш учун лицензия берилмаганини маълум қилди.
Қайд этилишича, вазирликнинг Telegram-ботига фуқаролар томонидан “Сурхондарё вилоятидаги Ат-Термизий университети томонидан берилган дипломлар Ўзбекистонда тан олинадими?” каби саволлар келиб тушмоқда.
“Мазкур ташкилот нодавлат олий таълим хизматлари фаолиятини бошлаш мақсадида Махсус электрон тизим орқали Олий таълим, фан ва инновациялар вазирлигига мурожаат қилмаган ва лицензияга эга эмас”, — дейилади хабарда.
“Таълим тўғрисида”ги қонуннинг 29-моддасига асосан, нодавлат таълим ташкилотлари лицензия олинган кундан эътиборан таълим фаолияти билан шуғулланишга ҳақлидир.
Абитуриентлар ва уларнинг ота-оналаридан фақатгина вазирликнинг “Edu.uz” расмий сайтида кўрсатилган давлат, нодавлат ва хорижий олийгоҳлар рўйхатидаги олий ўқув юртларини танлашлари сўралади.
Мазкур университет ўзининг Telegram канали орқали ҳозирда талабаларни қабул қилмаётгани, Олий таълим, фан ва инновациялар вазирлигидан тегишли лицензияни ҳали олмаганлигини билдирган.
2022 йил июнда Сурхондарё вилоятида тегишли рухсатномасиз хусусий университет ташкил этиб, фуқаролардан пул ундириш ҳолати аниқланганди. Ўшанда М.Ж. ва С.С. исмли шахслар ўзаро тил бириктириб, “У.А.” МЧЖни ташкил этгани ва Telegram’да Аt-Termiziy University хусусий университети каналини очиб, фаолият юритишга тегишли рухсатнома олмасдан, у ерга ўқишга қабул бошлангани ҳақида хабарлар бергани маълум бўлганди.
Изоҳ (0)