Ташқи меҳнат миграцияси агентлиги 2023 йилнинг олти ойида қанча ўзбекистонлик хориж давлатларида манзилли ишларга жойлаштирилганини очиқлади.
Маълум қилинишича, хорижнинг ваколатли ташкилотлари ва салоҳиятли иш берувчилари билан олиб борилган музокаралар натижасида Буюк Британия, Болгария, Руминия, Латвия, Польша, Германия, Россия, Қозоғистон каби давлатлардан 58 та ташкилот билан ҳамкорлик келишувлари имзоланиб, уларда 30 мингга яқин бўш иш ўринлари аниқланган.
Ҳисобот даврида Россия, Жанубий Корея, Буюк Британия, Туркия, Германия, Литва, Болгария, Польша, Руминия каби давлатларда жами 21 595 нафар ўзбекистонлик манзилли ишларга жойлаштирилган.
Шунингдек, агентлик томонидан меҳнат мигрантлари ҳуқуқ ва манфаатларини ҳимоя қилиш, моддий ёрдам кўрсатиш борасида жами 120 мингга яқин фуқарога хизматлар кўрсатилган. Шундан, 103 мингдан ортиғига маслаҳат хизмати, 6 700 дан ортиғига ҳуқуқий, 7 600 дан ортиғига ижтимоий, 1 424 нафарига моддий, шундан, 935 нафарига БҲМнинг 2 баравари миқдорида бир марталик моддий ёрдам кўрсатилган.
Бундан ташқари, 36 нафар фуқаро вақтинчалик хостелларга жойлаштирилган, оғир вазиятларга тушиб қолган 202 нафар юртдошимиз эса Ўзбекистонга олиб келинган. Агентликнинг хориждаги ваколатхоналари аралашуви билан Ўзбекистон фуқароларининг иш берувчиларидан 516 минг доллар миқдоридаги иш ҳақлари ундириб берилган.
Камбағалликни қисқартириш ва бандлик вазирлигига кўра, 2022 йилда 60 мингга яқин ўзбекистонлик бошқа давлатларга ишлаш учун кетган. Қайд этилишича, мамлакат аҳолисининг 2 миллион нафардан кўп қисми бошқа давлатларда турли соҳаларда меҳнат қилмоқда.
Июнь охирларида бир гуруҳ Ўзбекистон фуқаролари ишлаш мақсадида Германияга бориб, қийин аҳволда қолгани ҳақида хабарлар тарқалганди. Унда 300 га яқин ёшлар ишлаш учун бориб сарсон бўлиб юргани, қаерга боришини билмай бир неча кундан бери вокзалда тунаётгани айтилган. Июль бошида бўлса, Ташқи меҳнат миграцияси агентлиги фуқароларни хорижда ишга жойлаштириш ваколатига эга бўлмаган ташкилотлар билан шартнома тузмасликка чақирди.
Изоҳ (0)