Давлат хавфсизлик хизмати олий таълим муассасаларига ўқишга киритиш билан боғлиқ ноқонуний ҳолатларга чек қўйди.
Хусусан, ДХХнинг Наманган вилояти бўйича бошқармаси ва вилоят ИИБ ходимлари ҳамкорлигида тезкор тадбир ўтказилган. Тадбирда Наманган давлат университети ўқитувчиси ўзганинг ишончига кириб, танишлари орқали унинг қариндошини Қирғизистондаги олий ўқув юртига ўқишга киритиб, сўнгра Ўзбекистондаги олий таълим муассасасига кўчириб бериш эвазига 4 минг АҚШ доллари олган вақтида ашёвий далиллар билан ушланган.
Самарқанд вилояти Паст Дарғом туманидаги умумтаълим мактабининг инглиз тили ўқитувчиси эса танишлари ёрдамида Тайлоқ туманида яшовчи фуқарони хорижий олий таълим муассасаси талабаси экани тўғрисида сохта ҳужжат тайёрлаб, Самарқанд давлат тиббиёт университетининг 2-босқичига ўқишга киритиб қўйиш эвазига 6 минг АҚШ доллари сўраган. Шунингдек, ўқитувчи унинг қариндошига инглиз тили бўйича миллий сертификат олиб бериш учун 1,2 минг доллар, жами 7,2 минг АҚШ доллари олган вақтида қўлга тушган.
Гулистон шаҳрида яшовчи 26 ёшли шахс Янгиер шаҳрида истиқомат қилувчи фуқарони Гулистон давлат университетининг сиртқи бўлимига ўқишга киритиб қўйиш эвазига 6 минг АҚШ доллари талаб қилиб, олдиндан 5,1 минг доллар олган вақтида Давлат хавфсизлик хизмати ва Бош прокуратура ҳузуридаги Департамент ходимлари томонидан ушланган.
Тезкор суриштирув ҳаракатлари давомида, у мазкур пул маблағининг 4,6 минг долларини вилоят Педагогларни янги методикаларга ўргатиш миллий маркази ўқитувчисига бериши кераклиги маълум бўлиб, ушбу шахс ҳам 200 доллар олган вақтида ушланган.
Ҳозирда барча ҳолатлар юзасидан мазкур фуқароларга нисбатан Жиноят кодексининг 168 (фирибгарлик) ва 28, 211-моддалари (пора бериш)билан жиноят ишлари қўзғатилиб, тергов ҳаракатлари олиб борилмоқда.
Май бошларида Самарқанд, Сирдарё ва Бухоро вилоятларида ўқишга киритиб қўйишни ваъда қилган шахслар ушлангани тўғрисида хабар берилганди. Февраль охирларида эса Ўзбекистон давлат жисмоний тарбия ва спорт университетининг Фарғона филиалида 2022/2023-ўқув йилида имтиҳон натижалари ўзгартирилиб, абитуриентлар қасддан йиқитилгани маълум бўлган эди.
Изоҳ (0)