Ёзнинг жазирама кунларида қуёш нурлари анчайин иссиқ ва тик тушади. Бундай вақтларда кўзни асраш ва уни тўғри ҳимоялаш муҳим. Кўп йиллик тажрибага эга офталмолог Ҳикматулло Содиқов “Дарё” мухбирига берган интервьюсида иссиқда кўзни асраш бўйича ўз тавсияларини берди.
Офталмологнинг айтишича, ёз ойларида бошқа вақтга нисбатан кўзда ўзига хос муаммолар кузатилади.
“Масалан, кўз қуриши синдромидан тортиб кўздаги босим ошиш, катаракта, эт ўсиши ва хиралашиш, тез ёшланиш каби ҳолатлар кузатилиши мумкин. Бунинг олидини олиш учун кўз соғлом бўлса, ҳимоя кўзойнакларидан фойдаланиш тавсия этилади. Агарда кўзда минус, плюс ёки астегматизм бўлса, тўрт қатламли кўзойнаклардан фойдаланиш лозим”, — деди Ҳикматулло Содиқов.
Шифокорнинг тавсия беришича, кўзи соғлом инсон нурга қараб туси ўзгарувчи кўзойнаклардан тақиб юриши мумкин. Кўз хиралиги учун буюрилган кўзойнаклардан ҳам туси ўзгарувчан қопламли кўзойнакларга мослаштириб фойдаланиш мумкин.
“Кўзни қуёш нуридан тўғри ҳимоялаш кўзнинг ҳимоя қаватини яхшилашга ёрдам беради. Шунингдек, кўз намлигини яхши ушлайдиган кўз томчилари бор, уни шифокор рецептисиз олиб, ишлаца бўлади. У ҳам кўз пардаси намлигини ошириб, турли нохушликлардан асрашга ёрдам беради. Қуёшда ҳимоя кўзойнакларисиз кўп юриш кўзнинг сарғайиб кетишига олиб келиши мумкин. Шунингдек, кўзнинг склера (оқсил) қавати устида ёғ пайдо бўлиши ва баъзиларда эса гўшт ўсиши мумкин”, — деди офталмолог.
Мавзуга доир:
Изоҳ (0)