Бухоро вилояти Шофиркон туманида ўзгага қасддан ОИВ инфекциясини юқтирган шахс аниқланди. Бу ҳақда Бухоро ИИБ матбуот хизмати хабар берди.
Маълум қилинишича, 1972 йилда туғилган Т.Ш. исмли шахс 2018 йил 29 март куни вилоят ОИTСга қарши курашиш маркази ходимлари томонидан ОИВ инфекциясини юқтириб олган шахс сифатида рўйхатга олиниб, “ОИВ тўғрисида”ги қонун билан таништирилиб, ўзининг ОИВ статусини билган ҳолда ОИВ инфекциясини бошқа шахсларга юқтирганлик учун жиноий жавобгарликка тортилиши тўғрисида огоҳлантирилиб, тилхат олинган.
Шунга қарамасдан, ўзининг ОИВ инфекциясига чалинганини била туриб, 2022 йилнинг 23 февралидан 2023 йилнинг июнигача ўзи билан бирга қонуний никоҳсиз яшаб келаётган, 1978 йилда туғилган Т.Н. билан бир неча маротаба ҳимоя воситаларисиз ўзаро жинсий алоқада бўлиб, ОИВ инфекциясини юқтирган.
Мазкур ҳолат юзасидан туман ИИБ томонидан Т.Ш.га нисбатан Жиноят кодексининг 113-моддаси 4-қисми (ўзида таносил касаллиги борлигини била туриб, бу касални бошқа шахсга юқтириш) билан жиноят иши қўзғатилиб, унинг яна неча кишига ушбу касалликни юқтиргани ёки юқтириш хавфи остида қолдиргани бўйича тезкор суриштирув ҳамда тергов ҳаракатлари олиб борилмоқда.
Изоҳ (0)