Экологик партия фракциясининг навбатдаги йиғилишида “Қайта тикланувчи энергия манбаларини жорий этишни жадаллаштириш муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонун лойиҳаси иккинчи ўқишда муҳокама этилди. Бу ҳақда парламент қуйи палатаси матбуот хизмати хабар берди.
Қайд этилишича, Ўзбекистон Экологик партиясининг дастурида мамлакатда “яшил иқтисодиёт”га ўтиш, қайта тикланувчи ва бошқа муқобил энергия манбаларини татбиқ этиш жараёнларини фаоллаштириш борасида алоҳида мақсад ва вазифалар белгилаб олинган.
Соҳанинг ҳуқуқий асосларини янада мустаҳкамлаш мақсадида ишлаб чиқилган мазкур қонун лойиҳаси билан қайта тикланувчи энергия манбалари қурилмаларини ўрнатган жисмоний ва юридик шахсларга бир қатор солиқ имтиёзлари белгиланмоқда.
Хусусан, умумий қуввати 100 киловаттгача бўлган қайта тикланадиган энергия манбалари қурилмаларидан фойдаланган ҳолда умумий тармоққа сотилган электр энергиясидан олинадиган даромадларни фойда солиғидан озод этиш таклиф этиляпти.
Шу билан бирга, қайта тикланадиган энергия манбаларидан фойдаланувчи жисмоний ва юридик шахсларни мол-мулк солиғидан, қурилмалар билан банд бўлган ерлар бўйича ер солиғидан озод этиш назарда тутилмоқда.
“Ердан оқилона фойдаланиш, кўп қаватли ишлаб чиқариш биноларини қуриш ҳамда ҳудудларнинг саноат салоҳиятини кенгайтириш мақсадида кўп қаватли ишлаб чиқариш биноларини фойдаланишга топширган тадбиркорларни мол-мулк солиғини пасайтирилган коэффициентларда тўлашга доир имтиёзлар белгилаш кўзда тутилмоқда”, — дейилади хабарда.
Йиғилишда фракция аъзолари қонун лойиҳаси Ўзбекистон Экологик партиясининг дастурий мақсад ва вазифаларини ўзида акс этганлигини инобатга олиб, уни иккинчи ўқишда қўллаб-қувватлаган.
16 февраль куни “2023 йилда қайта тикланувчи энергия манбаларини ва энергия тежовчи технологияларни жорий этишни жадаллаштириш чора-тадбирлари тўғрисида”ги президент қарори имзоланганди. Унда қайта тикланувчи энергия манбаларини ўрнатган шахслар қатор солиқлардан озод этилиши белгиланган.
Изоҳ (0)