Сурхондарё вилояти Сариосиё туманида кузатилган сел оқибатида аҳоли пунктларини боғловчи тоғли довон йўли ёпилиб қолди. Бу ҳақда ФВВ матбуот хизмати хабар берди.
Маълум қилинишича, 7 июль куни соат 14:20 атрофида Сариосиё тумани тоғли ҳудудида қисқа муддатли кучли ёмғир ёғиши сабабли сел оқимлари келиши ҳодисаси кузатилган. Оқибатда туманнинг “Хўжаасмин” ва “Чош” аҳоли яшаш пунктларини боғловчи тоғли довон автомобиль йўлига катта ҳарсангтошлар ва лойқалар тушиб, довон йўли ёпилиб қолган. Мазкур ёпилиб қолган довон йўлида 3 та енгил “УАЗ” русумли автомобиль ва 8 нафар фуқаро ҳаракатсиз қолиб кетган.
Зудлик билан ҳодиса жойига вилоят Фавқулодда вазиятлар бошқармаси ва унинг ҳудудий бўлими ходимлари етиб бориб, туман ҳокимлиги, Ички ишлар бўлими ва “Хондиза” кон бойитиш бошқармаси масъул ходимлари ҳамкорлигида, махсус техникалар ёрдамида довон автомобиль йўли катта харсангтош ва лойқалардан тозаланган.
Қайд этилишича, автомобиль қатнови йўлга қўйилиб, 8 нафар фуқарога амалий ёрдам кўрсатилган. Ҳодиса оқибатида тан жароҳати олган ва ҳалок бўлганлар йўқ.
Сел хавфи
2022 йил май ойида Сурхондарёда 40 га яқин хонадонни сел босиб, 230 дан ортиқ киши эвакуация қилинганди. Шунингдек, Сирдарёда сув тошқини оқибатида 2 та кўп қаватли уй бутунлай яроқсиз ҳолга келгани, Жиззахда сел оқимида қолиб кетган икки фуқаро ички ишлар ходимлари томонидан қутқарилгани тўғрисида хабар берилганди.
Бундан ташқари, ўтган йили Қамчиқ довонида сел туфайли поездни электр қуввати билан таъминловчи устун қулаб тушган эди. Юзага келган вазият оқибатларини бартараф этиш мақсадида тезкор штаб тузилиб, Қамчиқ МҚЁҚБ ва “Ўзбекистон темир йўллари” АЖ махсус авария-тиклаш бригадаси ва муҳандислик техникалари билан йўлда таъмирлаш ишлари олиб борилиб, электр таянч устуни ҳамда йўл остидан қўшимча сел ўтказгич қуриш ишлари амалга оширилган.
Изоҳ (0)