Ўзбекистон президенти Шавкат Мирзиёев Туркманистон Миллий етакчиси, Халқ Маслаҳати раиси Гурбангули Бердимуҳамедов билан телефон орқали мулоқот қилди. Бу ҳақда Президент матбуот хизмати хабар берди.
Суҳбат аввалида Туркманистон етакчиси Ўзбекистон раҳбарини муддатидан илгари ўтказилган президент сайловида қозонган ишончли ғалабаси билан самимий табриклаб, қардош Ўзбекистон халқига фаровонлик ва равнақ тилаган.
Ўзбекистон—Туркманистон дўстлик, яхши қўшничилик ва стратегик шериклик муносабатлари кейинги йилларда изчил ривожланиб бораётгани катта мамнуният билан қайд этилган.
“Саноат, энергетика, қишлоқ хўжалиги ва бошқа тармоқларда амалий ҳамкорлик кенгайиб бормоқда. Парламентлар ўртасидаги алоқалар ва гуманитар алмашинувлар фаоллашди. Ўзбекистон ва Туркманистон етакчилари минтақавий кун тартибидаги масалалар юзасидан фикр алмашдилар. Бўлажак икки томонлама тадбирлар режаси кўриб чиқилди”, — дейилади хабарда.
Ўзбекистонда муддатидан олдин ўтказилган президентлик сайлови
Ўзбекистонда муддатидан илгари президент сайлови 2023 йил 9 июль куни бўлиб ўтди. Мамлакат бўйлаб очилган 10 мингдан ортиқ сайлов участкалари соат 8:00 дан соат 20:00 га қадар сайловчиларни қабул қилди. Марказий сайлов комиссияси берган маълумотга кўра, сайловда жами рўйхатга олинган сайловчининг 15,6 миллион нафари, яъни сайловчиларнинг 79 фоизи овоз берди. Сайлов кодексининг 96-моддасига мувофиқ, агар сайловчилар рўйхатига киритилган фуқароларнинг 33 фоизи овоз беришда иштирок этган бўлса сайлов ўтган ҳисобланади.
Президент сайловининг дастлабки натижаларига кўра:
Улуғбек Иноятов (ХДП) — 4,2 фоиз;
Абдушукур Ҳамзаев (Экологик партия) — 3,74 фоиз;
Робахон Маҳмудова (“Адолат”) — 4,43 фоиз;
Шавкат Мирзиёев (ЎзЛиДеП) — 87,05 фоиз овоз тўплаган.
Изоҳ (0)