4-may kuni Jizzax viloyati Zomin tumanining tog‘li hududlarida kuzatilgan kuchli yog‘ingarchilik natijasida tumanning Peshag‘or, Achchi, Qang‘li va Sho‘rcha qishloqlaridan o‘tgan soylarda sel suvlari oqimi kuzatilgani to‘g‘risida xabar berilgandi. Viloyat IIBning ma’lum qilishicha, mazkur sel oqimi yo‘lida qolib ketgan ikki fuqaro qutqarilgan.
Ma’lum qilinishicha, kuchli yog‘ingarchilik oqibatida sel suvlari Jizzax—Zomin avtomobil yo‘li ostida o‘rnatilgan quvurlarga sig‘masdan ushbu yo‘lning 25, 26, 27-kilometrlari ustidan toshib o‘tgan. Mazkur sel oqimi yo‘lida ikki nafar fuqaro qolib ketgan va ular ichki ishlar organlari xodimlari tomonidan qutqarilgan. Ta’kidlanishicha, hozirda ularning ahvoli yaxshi.
Sel oqibatlarini bartaraf etishda viloyat favqulodda vaziyatlar boshqarmasining 140 nafar qutqaruvchisi va 8 ta maxsus texnikasi, shuningdek, favqulodda vaziyatlarning oldini olish va bunday vaziyatlarda harakat qilish davlat quyi tizimiga kiruvchi tashkilotlarning 83 nafar shaxsiy tarkibi va 25 ta maxsus texnikasi jalb etilgan. Xodimlar tomonidan sel suvlari toshgan ko‘chalar, aholi xonadonlarida o‘rganishlar olib borilib, sel qoldiqlari tozalanmoqda. Hozirda hovli va yerto‘lalarda to‘plangan suv maxsus texnikalar yordamida chiqarilmoqda. Hodisa oqibatida jabrlanganlar yo‘q.
Eslatib o‘tamiz, “O‘zgidromet” 3—4-mayda Volgabo‘yi hududlaridan nam va nisbatan salqin havo massalari kirib kelishini ma’lum qilgandi. 3-may kuni kuchli yog‘ingarchilik sabab O‘zbekistonning ayrim hududlarida sel oqimlari va toshqin suvlari yuzaga keldi. Kechga borib Zomin tumanining tog‘li hududlarida kuzatilgan sel oqimlari to‘xtadi. Kuchli yog‘ingarchiliklar tufayli Qamchiq dovoni vaqtincha yopildi va bir necha soat o‘tgach qayta ochildi.