Surxondaryoda 40 ga yaqin xonadonni sel bosib, 230 dan ortiq kishi evakuatsiya qilindi

Surxondaryo viloyatining Uzun tumanida yuzaga kelgan sel oqimlari oqibatlari bartaraf etilmoqda, deb xabar beradi FVV matbuot xizmati.

5-may kuni soat 23:00 da Surxondaryo viloyati Uzun tumanida tog‘ va adirliklarida kuzatilgan kuchli yog‘ingarchilik oqibatida “Mustaqillikning 22 yilligi” MFY “Toshtepa” qishlog‘i hududidan oqib o‘tuvchi “O‘rta ariq” kanalida suv miqdori me’yoridan oshib ketishi natijada kanaldan toshib, unga yaqin joylashgan 40 ga yaqin aholi uylari, tomorqalari va “Dehqon” mahallasida 15 ta aholi tomorqalariga kirgan.

Aholi xavfsizligini ta’minlash maqsadida “Toshtepa” qishlog‘idagi 40 ta xonadonlardan 230 dan ortiq fuqaro viloyat FVB rahbariyati boshchiligida qutqaruvchilar, Ichki ishlar, Milliy gvardiya hamda viloyat hokimligi mas’ul xodimlari bilan hamkorlikda tumanda joylashgan 19-sonli umumta’lim maktabiga vaqtinchalik ko‘chirib o‘tkazilgan.

Hodisa oqibatida aholini tan jarohat olishi holatlari to‘g‘risida ma’lumot kelib tushmagan. Vaziyat to‘liq Favqulodda vaziyatlar vazirligi nazoratida.

“Voqea joyida xonadonma-xonadon yurib, holatning ko‘lami va talofatlarni aniqlash, maxsus texnikalar yordamida hodisa oqibatlarini bartaraf etish ishlari olib borilmoqda”, — deyiladi xabarda.

Uzun tumani hokimligining ma’lum qilishicha, sel suvlari qishloqlarining ichki yo‘llariga toshgan hamda ayrim aholi xonadonlarining xovli va tamorqalariga zarar yetkazgan. Hozirda sel oqimidan so‘ng yo‘llarda yig‘ilib qolgan qum-shag‘al va loyqalarni tozalash ishlari maxsus muhandislik texnikalari yordamida amalga oshirilmoqda. Ushbu tozalash ishlari tuman hokimiyati tomonidan nazoratga olingan.

3-may kuni Surxondaryo viloyatining Sariosiyo tumani Sangardak va Xursandsoy soyida ham sel kuzatilgani to‘g‘risida xabar berilgandi.

Eslatib o‘tamiz, “O‘zgidromet” 3—4-mayda Volgabo‘yi hududlaridan nam va nisbatan salqin havo massalari kirib kelishini ma’lum qilgandi. Kuchli yog‘ingarchilik sabab O‘zbekistonning ayrim hududlarida sel oqimlari va toshqin suvlari yuzaga keldi. Markaz 5-mayda ham tog‘oldi va tog‘li hududlarda, xususan, Surxondaryo viloyatining 9 ta tumanida sel-suv toshqin hodisalari yuzaga kelishi xavfi mavjud ekanini aytib o‘tgandi.