Анди Аранитаси Европа тикланиш ва тараққиёт банкининг (ЕТТБ) Ўзбекистондаги ваколатхонаси директори ва раҳбари этиб тайинланди. У 2023 йил 1 сентябрда ўз лавозим мажбуриятларини бажаришга киришади.
“ЕТТБнинг энг динамик банк ва консултацион бўлинмаларидан бирига раҳбарлик қилишимдан жуда мамнунман. Ўзбекистон жадал ўсиб бораётган иқтисодиётга эга бўлиб, у катта тажриба ва кўплаб соҳаларда молиявий қўллаб-қувватлов талаб қилади: қайта тикланувчи энергия манбалари ва инфратузилмаларидан тортиб кичик ва ўрта тадбиркорликни ҳамда тўғридан тўғри хорижий инвестициялар жалб қилишгача. Мен ўз тажрибам ва кучимни мамлакат билан ҳамкорликни ривожлантиришга ва Ўзбекистон бўйича 2023 йил охиригача тасдиқланиши керак бўлган янги давлат стратегиямизни амалга оширишга йўналтираман”, — дейди Аранитаси.
Альбания ва Буюк Британия фуқароси сифатида Аранитаси банк соҳасида, шунингдек, ишлаб чиқариш, телекоммуникация, агробизнес, кўчмас мулк, туризм ва энергетика соҳасида 25 йилдан ортиқ тажрибага эга. ЕТТБдаги фаолияти давомида у банкнинг энергетика бўлинмаларида турли масъул лавозимларда ишлаган ҳамда Туркия ва Жануби-шарқий Европадаги энергетика лойиҳалари портфелини ишлаб чиқиш, амалга ошириш ва бошқариш учун масъул бўлган. Ўзбекистондаги лавозимга тайинлангунга қадар у ЕТТБнинг Шимолий Македониядаги вакили эди.
У мазкур лавозимда 2017 йилдан бери фаолият юритиб келаётган Алкис Дракинос ўрнини эгаллайди. Ўз навбатида Дракинос ЕТТБнинг Кавказдаги минтақавий офиси раҳбари лавозимига тайинланган.
Маълумотларга кўра, Европа тикланиш ва тараққиёт банки ҳозирга қадар Ўзбекистон иқтисодиётига 144 лойиҳа доирасида 4,3 миллиард доллардан ортиқ инвестиция киритган.
Изоҳ (0)