Украина ҳали НАТОга киришга тайёр эмас, аммо АҚШ унга Исроилга берилган хавфсизлик кафолатларини бериши мумкин, деди Қўшма Штатлар президенти Жо Байден CNN телеканалига берган интервьюсида.
АҚШ президентининг сўзларига кўра, Украинанинг НАТОга аъзолиги масаласини овозга қўйиш учун ҳали эрта, чунки хавфсизликдан “бошқа талаблар ҳам бор, жумладан, демократлаштиришга оид”.
“Украина ҳозир НАТО аъзолигига тайёр эмас. Альянс аъзолари ўртасида Украинанинг НАТОга қабул қилиниши борасида якдиллик йўқ. Лекин Украинага НАТОга аъзо бўлиш учун оқилона йўл таклиф қилиш керак”, — деди Байден.
Хусусан, “тинчлик жараёни” бошланганидан кейин Қўшма Штатлар Украинага Исроилга ўхшаш хавфсизлик кафолатларини бериши мумкин, деди Америка президенти.
Исроил НАТО аъзоси эмас, аммо Саудия Арабистони билан бирга АҚШнинг Яқин Шарқ минтақасидаги энг йирик иттифоқчиси ҳисобланади. 1999 йилда АҚШ ҳукумати Исроил билан ўзаро англашув меморандумини имзолаган, унга кўра Исроилга ҳар йили миллиардлаб долларлик ҳарбий ёрдам кўрсатиш мажбуриятини олган. Бундан ташқари, Исроилдаги хорижий ҳарбий объектларнинг барчаси АҚШ базалари ҳисобланади.
Июнь ўрталарида The New York Times газетаси АҚШ президенти ёрдамчиларига таяниб, Вашингтон Украинага ҳамкорликнинг “Исроил модели”ни таклиф қилиш имкониятини кўриб чиқаётгани ҳақида хабар берганди. Газета маълумотларига кўра, бу модел “хавфсизлик бўйича 10 йиллик мажбурият”ни назарда тутади, аммо Киев олдидаги мажбуриятлар “унчалик узоқ муддатли бўлмайди”.
Киев бу маълумотларнинг тўғрилигини тасдиқлади.
Изоҳ (0)