Литва, Польша ва Латвия президентлари Гитанас Науседа, Анжей Дуда ҳамда Эгилс Левитс НАТО бош котиби Йенс Столтенберг ва альянс давлатлари раҳбарларига мактуб йўллаб, уларни Беларусдаги вазиятнинг ривожланиши билан боғлиқ таҳдидларга қарши чоралар кўришга чақирди. Мурожаат ҳақидаги маълумот 7 июль, жума куни Литва раҳбари матбуот хизмати томонидан тарқатилди.
Мактуб муаллифлари таъкидлашича, Москва ва Минск ўртасида “борган сари яқинлашаётган ҳарбий интеграция минтақа ва бутун Евро-Атлантика маконининг хавфсизлигига” рахна солади. Бу, хусусан, Беларусда тактик ядровий қуролларнинг жойлаштирилиши билан боғлиқ. Бу қадам — Россия ва НАТОнинг хавфсизлик тўғрисидаги актини очиқдан очиқ бузиш ҳисобланади ҳамда “бу ҳужжат энди амал қилмаслигини” тасдиқлайди.
Улар шунингдек, “Вагнер” ёлланма аскарлари ва Евгений Пригожиннинг Беларусга кўчирилиши ушбу мамлакатда “сиёсий барқарорлик учун хавф” туғдиришини, бунинг оқибатида “ядро қуроллари устидан назоратни йўқолишини”, деб таъкидлади.
Мурожаат муаллифларининг фикрича, Беларусь учинчи давлатлардан Европа Иттифоқига ноқонуний муҳожир миграциясининг янги тўлқинини ҳам ташкиллаштириши мумкин.
Уч давлат раҳбарлари бир неча таклифлар билдирган, жумладан: ядровий тийиб туришни қайта кўриб чиқиш, Беларусдан келиб чиқадиган одатий таҳдидларга мослашиш, шарқий қанотдаги армия захираларини тўлдириш, мудофаа харажатларини ялпи ички маҳсулотнинг икки фоизидан кўпроққа ошириш, харажатларни НАТО устуворликларига мослаштириш, иттифоқчиларнинг гибрид таҳдидларга чидамлилигини ошириш кабилар.
6 июль куни Александр Лукашенко “Вагнер” хусусий ҳарбий компанияси Беларусда жойлаштирилса, ундан мамлакатни ҳимоя қилиш учун фойдаланиши мумкинлигини айтганди.
“Ушбу жангчиларни жойлаштиришдан мутлақо хавотирда эмасман ва ташвишланмайман”, деди Лукашенко. “Асосий шарт шуки, агар биз ушбу бўлинмадан давлат мудофааси учун фойдаланишга мажбур бўлсак, улар бир зумда исталган йўналишда фаоллашади”, — дея қўшимча қилди Беларусь раҳбари.
Изоҳ (0)