Туркия президенти Ражаб Тоййиб Эрдўғон Украина раҳбари Владимир Зеленский билан учрашувдан сўнг, Украина НАТОга аъзо бўлишга лойиқ эканини айтди, деб хабар бермоқда “АHaber”.
“Ёрдамимиз орқали Украина билан бирдамлигимизни аниқ қилиб кўрсатдик. Биз музокаралар орқали (ҳарбий ҳаракатларни) тугатиш йўлида энг кўп ҳаракат қилган давлат бўлдик”, — деди Эрдўғон.
У Россия ва Украина охирги марта тинчлик музокараларини Истанбулда ўтказганини эслатди. Бундан ташқари, Туркия раҳбари Анқаранинг ғалла битимида бир йил аввалги иштирокини тилга олди.
“Эҳтиёжмандларга бир йилда 33 миллион тоннага яқин ғалла етказиб берадиган ташаббус 17 июлга қадар узайтирилишини истаган эдим”, — деди у.
Эрдўғон келишувни камида ҳар уч ойда, энг яхшиси икки йилга узайтиришни хоҳлашини қўшимча қилди, деб хабар бермоқда TRT Haber. Россия эса қишлоқ хўжалиги экспортига қўйилган чекловлар бекор қилинмаса, шартномани узайтирмаслик билан таҳдид қилмоқда.
Туркия раҳбари, шунингдек, Киев ва Москва билан маҳбусларни алмашиш бўйича музокаралар олиб борилишини маълум қилди. Эрдўғоннинг сўзларига кўра, у бу ҳақда Владимир Путин билан гаплашган ва Путин келаси ой Туркияга ташриф буюргунга қадар бу масалани телефон орқали муҳокама қилишда давом этади.
Эслатиб ўтамиз, 7 июль куни Владимир Зеленский Туркияга ташриф буюриб, Эрдўғон билан учрашди. Улар ғалла келишуви, Киевнинг НАТОга аъзолиги, маҳбуслар алмашинуви, икки томонлама ҳамкорлик ва Украинани қайта тиклаш масалаларини муҳокама қилди. Бу Зеленскийнинг уруш бошланганидан бери Туркияга биринчи ташрифи бўлди.
Изоҳ (0)