Польша президенти Анжей Дуда НАТО давлатларини Украинага урушдан кейинги хавфсизлик кафолатларини беришга чақирди. Унинг фикрича, бу аскарлар руҳияти учун муҳим, деб ёзмоқда Financial Times.
Дуда хавфсизлик кафолатлари ваъдаси ва НАТОнинг қўллаб-қувватловини ҳис қилиш Украина расмийлари учун ҳам, аскарлари учун ҳам муҳим эканини қайд этган.
FT таъкидлаганидек, НАТО мамлакатлари Украинага бера оладиган кафолатлар бошқача тузилишда бўлиб, НАТОнинг етакчи кучларини, масалан, АҚШ, Буюк Британия ва Францияни келажакда Украинага ҳужум қилинган тақдирда ҳарбий ёрдам кўрсатишга мажбур қилади. НАТОнинг собиқ бош котиби Андерс Фог Расмуссен бундай кафолатларни Исроил АҚШдан олган кафолатларга ўхшаш деб таърифлади.
Украина НАТО аъзоси эмас, аммо 2020 йил июнь ойида мамлакат алянс билан ҳамкорликнинг алоҳида мақомига эга бўлди — бу украин қўшинларининг алянс кучлари билан ўзаро ҳамкорлигини кучайтириш имконини берувчи кенгайтирилган имкониятларни тақдим қилади, бироқ НАТОга соддалаштирилган тартибда қўшилиш ва келажакда албатта унга аъзо бўлишни англатмайди.
Уруш бошланганидан кейин Киев ўзининг хавфсизлик кафолатлари лойиҳасини таклиф қилганди, унда АҚШ, Буюк Британия, Канада, Польша, Италия, Германия, Франция, Австралия ва Туркия кафил сифатида таклиф қилинган. Ҳужжатда асосий кафолатлар қаторида Украина ҳарбий-саноат комплексига сармоя киритиш, унга разведка маълумотларини узатиш ҳамда республика Қуролли кучларини Европа Иттифоқи ва НАТО раҳбарлигида тайёрлаш кабилар қайд этилган.
Изоҳ (0)