Қозоғистон президенти Қосим-Жўмарт Тўқаев Шанхай ҳамкорлик ташкилоти (ШҲТ) фаолият юритаётган 20 йил вақт давомида ташкилот шафелигида бирорта йирик иқтисодий лойиҳани амалга оширишнинг имкони бўлмаганини айтди.
Тўқаев бунга сабаб қилиб лойиҳа фаолиятини молиявий қўллаб-қувватлаш механизмларининг йўқлигини кўрсатди ва муаммони ҳал қилиш учун ШҲТ доирасида инвестиция фондини яратишга чақирди.
“Қайд этиш керакки, 20 йилдан ортиқ вақт давомида ШҲТ шафелигида бирорта ҳам йирик иқтисодий лойиҳани амалга оширишнинг имкони бўлмади. Лойиҳа фаолиятини молиявий қўллаб-қувватлаш механизмларининг йўқлиги очиқ омил ҳисобланади. Шу боис ҳукуматлар раҳбарлари кенгашига қўшма инвестиция фондини ташкил этиш имкониятларини кўриб чиқиш ва ушбу муҳим лойиҳа бўйича таклифлар киритишни топширишни таклиф қиламан”, — деди Тўқаев ШҲТга аъзо давлатлар раҳбарларининг онлайн мажлисида.
Қозоғистон президенти ташкилотнинг энергетика стратегиясини ишлаб чиқишни ҳам таклиф қилди.
“Навбатдаги Остона саммитигача ШҲТ энергетика стратегиясини мувофиқлаштиришни таклиф қиламан. Мазкур ҳужжатнинг қабул қилиниши БМТ барқарор ривожланиш кун тартибидаги мақсадларни амалга оширишга хизмат қилади”, — деди президент.
4 июль куни Нью-Деҳли шаҳрида ШҲТ давлатлари раҳбарлари кенгашининг 23-саммити виртуал форматда бўлиб ўтди. Учрашувда Эрон ШҲТга тўлиқ қабул қилинди. Унга қадар ШҲТ таркибига саккизта давлат кирар эди: Россия, Ҳиндистон, Қозоғистон, Қирғизистон, Хитой, Покистон, Тожикистон ва Ўзбекистон.
Изоҳ (0)