Қозоғистон аҳолиси сони маълум бўлди 

Қозоғистон Миллий статистика бюроси мамлакатдаги аҳоли сони бўйича янгиланган маълумотларни тақдим этди. Бу ҳақда “Курсив” хабар берди.

Маълумотларига кўра, мамлакат аҳолиси сони 2023 йил 1 июнь ҳолатига кўра 19 миллион 879 минг 003 кишини ташкил қилган. Йил бошидан буён мамлакат аҳолиси сони 112 минг кишига кўпайди. Жами 12,2 миллион киши шаҳарларда, 7,6 миллион киши қишлоқларда истиқомат қилади.

Аҳоли сони бўйича биринчи учликка Туркистон (2,1 миллион), Олмаота (1,5 миллион) ва Қарағанда (1,1 миллион) вилоятлари киради.

Аксарият аҳоли республика аҳамиятига молик шаҳарларда истиқомат қилади: Олмаота (2,1 миллион), Остона (1,3 миллион) ва Чимкент (1,2 миллион).

Шимолий Қозоғистон (977 киши), Шарқий Қозоғистон (425 киши) ва Костанай вилоятларида (374 киши) аҳоли сони камайган.

Миграция бўйича аҳолининг чиқиб кетиши 15 та вилоятда содир бўлган, ижобий кўрсаткич 5 та ҳудудларида кузатилган. Аҳолининг Олмаота, Остона, Чимкент шаҳарларига, шунингдек, Манғистов ва Олмаота вилоятларига кўчиши давом этмоқда.

Маълумот ўрнида, Қозоғистон аҳолиси 2022 йилда 261 845 кишига кўпайганди.