Qozog‘iston prezidenti Qosim-Jo‘mart To‘qayev Shanxay hamkorlik tashkiloti (SHHT) faoliyat yuritayotgan 20 yil vaqt davomida tashkilot shafeligida birorta yirik iqtisodiy loyihani amalga oshirishning imkoni bo‘lmaganini aytdi.
To‘qayev bunga sabab qilib loyiha faoliyatini moliyaviy qo‘llab-quvvatlash mexanizmlarining yo‘qligini ko‘rsatdi va muammoni hal qilish uchun SHHT doirasida investitsiya fondini yaratishga chaqirdi.
“Qayd etish kerakki, 20 yildan ortiq vaqt davomida SHHT shafeligida birorta ham yirik iqtisodiy loyihani amalga oshirishning imkoni bo‘lmadi. Loyiha faoliyatini moliyaviy qo‘llab-quvvatlash mexanizmlarining yo‘qligi ochiq omil hisoblanadi. Shu bois hukumatlar rahbarlari kengashiga qo‘shma investitsiya fondini tashkil etish imkoniyatlarini ko‘rib chiqish va ushbu muhim loyiha bo‘yicha takliflar kiritishni topshirishni taklif qilaman”, — dedi To‘qayev SHHTga a’zo davlatlar rahbarlarining onlayn majlisida.
Qozog‘iston prezidenti tashkilotning energetika strategiyasini ishlab chiqishni ham taklif qildi.
“Navbatdagi Ostona sammitigacha SHHT energetika strategiyasini muvofiqlashtirishni taklif qilaman. Mazkur hujjatning qabul qilinishi BMT barqaror rivojlanish kun tartibidagi maqsadlarni amalga oshirishga xizmat qiladi”, — dedi prezident.
4-iyul kuni Nyu-Dehli shahrida SHHT davlatlari rahbarlari kengashining 23-sammiti virtual formatda bo‘lib o‘tdi. Uchrashuvda Eron SHHTga to‘liq qabul qilindi. Unga qadar SHHT tarkibiga sakkizta davlat kirar edi: Rossiya, Hindiston, Qozog‘iston, Qirg‘iziston, Xitoy, Pokiston, Tojikiston va O‘zbekiston.
Izoh (0)