Нурсултон Назарбоев яна бир мақомидан маҳрум қилинди

Нурсултон Назарбоев ўз номидаги Автоном таълим ташкилотлари олий васийлик кенгаши раҳбари мақомидан маҳрум этилди. Бу ҳақда Akorda хабар берди.

Давлат раҳбари Қозоғистон Республикасининг “Қозоғистон Республикасининг айрим қонун ҳужжатларига касбий малака, давлат мукофотлари, ижтимоий таъминот ва таълим масалалари бўйича ўзгартиш ва қўшимчалар киритиш тўғрисида”ги қонунини имзолади, — дейилади Акорда сайтида.

Сенат 29 июнь куни тегишли қонун лойиҳасини маъқуллаган.

Уни амалга ошириш учун “Назарбоев университети мақоми тўғрисида”, “Назарбоев интеллектуал мактаблари” ва “Назарбоев жамғармаси” каби қатор қонунларга ўзгартириш ва қўшимчалар киритилади.

“Давлат раҳбарининг автоном таълим ташкилотларининг олий васийлик кенгашини тузиш бўйича ваколатларини белгилашга ўзгартиришлар киритиш кўзда тутилмоқда”, — дейилади Сенат баёнотида.

Қонуннинг амалдаги таҳририда Олий Васийлик кенгашининг биринчи раиси Нурсултон Назарбоев ҳисобланади. Ўзгартиришларга мувофиқ, президент ёки у томонидан тайинланган шахс олий васийлик кенгашининг раиси бўлади.