Германиянинг ихтисослашган Fruchtportal янгиликлар порталида “Туркия Ўзбекистондан олхўри, пиёз ва нўхат импорти бўйича божларни бекор қилди” сарлавҳали мақола эълон қилинди.
Қайд этилишича, Туркия ва Ўзбекистон ўртасида имзоланган имтиёзли савдо шартномаси доирасида Ўзбекистондан бир қатор товарларни олиб киришда божхона тўловлари бекор қилинган.
Туркиянинг “Расмий газета”сида (T.C. Resmî Gazete) тарқатилган ахборотга таянган ҳолда таъкидланишича, Туркия ва Ўзбекистон ўртасида имзоланган имтиёзли савдо битими доирасида Ўзбекистондан бир қатор товарларни олиб киришда қўлланиладиган тариф квоталари тартибга солинган.
Хусусан, ҳужжатда пиёз, нўхат ва олхўри каби Ўзбекистон маҳсулотларига божлар бекор қилиниши кўзда тутилган. “Кўриб чиқилаётган тариф квоталари доирасида ушбу маҳсулотларга божхона божи нолга туширилади. Бу ҳақдаги тегишли қарор ва буйруқ 2023 йилнинг 1 июлидан кучга киради”, — деб ёзади Германия ахборот манбаси.
Февраль ойида “Халқаро шартномани тасдиқлаш тўғрисида”ги президент қарори қабул қилинганди. Қарорга мувофиқ, Ўзбекистон билан Туркия ўртасида имтиёзли савдо тўғрисида битим тасдиқланган. Мазкур битим 2022 йил 29 март куни Тошкент шаҳрида имзоланган эди.
2022 йил августига кўра, икки мамлакат ўртасида сўнгги беш йил ичида ўзаро савдо ҳажми икки баравар ўсган ва 2021 йилда 3,4 миллиард долларга етган. Ўзбекистон—Туркия товар айирбошлаш ҳажмини 2023 йилда 5 миллиард долларга, яқин истиқболда эса 10 миллиард долларга етказиш мақсадида ушбу йўналишдаги ҳамкорликни давом эттириш билдирилганди.
Изоҳ (0)