2023 йил 4 июль куни тўқимачилик соҳасидаги талабгир касблар бўйича Германиядаги дуал ўқитиш тажрибасига таяниб ишлаб чиқилган умумий таълим дастурлари ҳукумат, иш берувчилар ва методист-педагоглардан иборат стейкхолдерларга тақдим этилди.
Ушбу янги таълим дастурлари Германия халқаро ҳамкорлик ташкилоти (GIZ) лойиҳаси доирасида таълимни ташкил қилиш бўйича мутахассислар, саноат корхоналари вакиллари ва ўқитувчилардан таркиб топган махсус ишчи гуруҳлари томонидан ўтган олти ой давомида яратилган эди. Бунда ишчи гуруҳлар GOPА глобал консалтинг компаниясининг германиялик халқаро экспертлари жамоаси кўрсатмаларига таянган. Янгича “дуал” ёндашув Ўзбекистондаги касб-ҳунар мактаб/коллеж ва техникумларида ҳамда саноат корхоналарида ўзаро келишув асосида касбга ўқитишни кўзда тутади.
“Германия – дуал касб-ҳунар таълими бўйича дунёдаги етакчи мамлакат. “дуал” сўзи таълим иккита жойда ташкил этилишини англатади, яъни ҳам касб-ҳунар мактабида, ҳам саноат корхонасида. Ҳа, ўқувчилар ишни фақат синфхоналарда эмас, келгуси воқеликда бевосита ишлайдиган корхоналарида амалий равишда ўрганишлари муҳим”, — дейди GOPА консултанти Бианка Енеке. “Халқаро тажрибада дуал ўқитишнинг 30 фоизи таълим муассасасида, 70 фоизи эса ишлаб чиқариш корхонасида ўтказилиши меъёри мавжуд”.
Тадбирда Олий таълим, фан ва инновациялар вазирлиги, Педагогик инновациялар институти, “Ўзтўқимачиликсаноат” уюшмаси, тўқимачилик корхоналарининг касбий малака бўйича тармоқ кенгашлари, иш берувчи корхоналар вакиллари, экспертлар ва бошқа маҳаллий муассасалар мутахассислари иштирок этди.
Ишлаб чиқилган асосий касбий таълим дастурлари муаллифлари Тошкент тўқимачилик ва енгил саноат институти доцентлари ва Педагогик инновациялар институти методистларидир. Муаллифлар бунда бевосита ўқувчиларга таълим берадиган педагоглар, саноат корхоналаридаги устоз ва инструкторлар ҳамда лойиҳанинг сиёсий ҳамкори бўлмиш ОТФИВ вазирлиги вакиллари таклифларини ҳам ҳисобга олган.
Амалий машғулотлар орқали компетенсияларни шакллантиришга қаратилган мазкур янгича тизим бўйича 15та ўқув муассасаси 2023-2024 ўқув йилидан бошлаб тажриба-синов сифатида касбга ўқита бошлайди. Маълумот учун, таълим дастурлари ишлаб чиқиш GIZ’нинг “Ўзбекистонда касб-ҳунар таълими тизимидаги ислоҳотлар ва модернизация жараёнларини қўллаб-қувватлаш” номли каттароқ лойиҳанинг бир қисмидир.
Дастурлар ишлаб чиқишдан аввал ушбу лойиҳа доирасида бандлик вазирлиги меҳнат бозорида энг талабгир деб топилган қуйидаги олтита касб бўйича профессионал стандартлар ишлаб чиққан эди: тикувчи, ип йигирувчи, тикувчиликда андозалар тайёрловчи, электрон техника асбобларини созловчи, тўқимачилик корхоналари қурилмалари монтажчиси, тўқимачилик соҳасида техник-технолог.
GIZ, шунингдек, Ўзбекистонда янги “дуал” ўқитишни синовдан ўтказиш учун танлаб олинган 15та касб-ҳунар мактаб/коллеж ва техникумларни замонавий жиҳозлар билан таъминламоқда.
Қолаверса, халқаро лойиҳанинг яна бир ажралмас қисми – ҳудудларда ўқувчи ва ота-оналар орасида касбга йўналтириш ва касбга янгича ўқитиш тизими имкониятлари ҳақида ахборот беришдир. Бу йилги қабул олдидан миллий ва халқаро экспертлар томонидан олтита касб бўйича видеороликлар ҳам тайёрланган эди.
Изоҳ (0)