Хитойдан Ўзбекистонга янги контейнер поезди жўнатилди

Хитойдан Ўзбекистонга янги мултимодал йўналиш бўйича контейнер поезди жўнатилди. Бу ҳақда “Ўзбекистон темир йўллари” АЖ ахборот хизмати хабар берди.

Унга кўра, 4 июль куни Лангфан–Қашқар–Иркештам–Ўш–Тошкент янги мултимодал йўналишида контейнерли блок-поездини жўнатиш маросими бўлиб ўтди. Лангфандан (Хитой) ҳаракатланувчи биринчи поезд (таркибида қурилиш материаллари бўлган 40 та вагон) сафарга чиқди.

Бутун йўлнинг масофаси тахминан 6000 километрни ташкил этади ва юкнинг умумий оғирлиги 1000 тоннадан ошади. Сафар вақти тахминан 12 кунни ташкил этади. Қайд этиш лозимки, ҳозирги вақтда ушбу йўналиш (қуруқликдаги) Хитойдан Ўзбекистонга юкларни етказиб бериш учун энг қисқа ва энг тезкор йўналиш ҳисобланади.

Янги мултимодал йўлак бўйлаб ташиш жараёни жўнаш пунктидан темир йўл орқали Қашқар (Хитой) темир йўл станциясигача амалга оширилади. Кейин эса, юклар автотранспортга ортилиб Ўш (Қирғизистон) темир йўл станциясига етказилади. Ўш станциясидан эса Тошкентгача юклар темир йўл орқали юк поезди таркибида етказилади.