Ўзбекистонлик зиёратчилар “Ҳаж—2023” мавсумини кўтаринки кайфиятда якунлади ва айни пайтда бирин-кетин мамлакатга қайтишга тараддуд кўрмоқда. Бу ҳақда Дин ишлари бўйича қўмита матбуот хизмати хабар берди.
Қайд этилишича, 4 июль куни биринчи гуруҳ зиёратчилар Ўзбекистонга қайтиб келади.
“Юртдошларимиз пойтахтимиздаги ‘Новза’ масжидидан тартибли равишда Тошкент халқаро аэропортига кузатилган эди. Ҳожиларимизни кутиб олиш жараёнини ҳам рисоладагидек, чиройли тартибда ташкил этиш мақсадида, айнан, шу масжидда кутиб олинишини маълум қиламиз”, — дейилади хабарда.
Қўмита кутиб олувчилардан аэропортга чиқиб, ортиқча овора бўлмасликни, қолаверса, аэропорт ҳудудида тирбандлик ҳосил қилмасликни сўрайди.
Ўзбекистонлик зиёратчилар 4–22 июль кунлари Жидда шаҳридан Ўзбекистоннинг 10 та ҳудуди — Тошкент, Наманган, Фарғона, Қарши, Термиз, Самарқанд, Бухоро, Навоий, Урганч ва Нукус сари парвоз қилиб, қайтиб келади.
Ўзбекистон фуқаролари учун ҳаж квотаси
2023 йилда Ўзбекистон фуқаролари учун умумий ҳаж квотаси 15 минг нафар этиб белгиланди. Бу йилги ҳаж мавсуми учун квота 12 мингдан 15 минг нафарга оширилгани қайд этилди. Кейинги йилларда мамлакатдан ҳаж сафарига борувчилар сонини босқичма-босқич ошириб бориш режалаштирилган.
Ҳар бир зиёратчига тўлов миқдори жамоатчилик кенгаши қарорига асосан 68 миллион 760 минг сўм этиб белгилаган эди.
Изоҳ (0)