Россиялик хонанда Григорий Лепс Украинага берилган немис Леопард танкини йўқ қилган россиялик жангчига миллион рубль тўлади. Бу ҳақда “РИА Новости” хабар берди.
Веном номи билан танилган ҳарбий хизматчи хонандадан пул мукофоти олганини тасдиқлади. 14 июнь куни Григорий Лепс ва Николай Басков Украина Қуролли кучлари танкини ишдан чиқарган ҳар бир кишига бир миллион рубль тўлашни таклиф қилганди.
Санкт-Петербург халқаро иқтисодий форумида санъаткорлар россиялик ҳарбийларга шахсий маблағлари ҳисобидан молиявий ёрдам бериш режалари ҳақида гапирган.
Уларнинг “ташаббусига” телебошловчи Юлия Барановская ва “Земляне”гуруҳи раҳбари Владимир Киселёв ҳам қўшилган. Григорий Лепс Россия “махсус ҳарбий операция”нинг бошиданоқ уни қўллаб-қувватлаган.
Дунёда Россия ва Украина ўртасидаги урушни очиқдан очиқ қўллаб-қувватловчи артистлар ва ижрочи гуруҳларни концерт беришларига кенг жамоатчилик кескин эътироз билдирмоқда.
Кўплаб мамлакатларда уларнинг концерт беришларига чеклов қўйилган. Хусусан, Ўзбекистонда май ойида бўлиши режалаштирилган Zhara (талаффузда “Жара” — “Дарё” изоҳи) халқаро мусиқа фестивали жамоатчиликнинг кескин эътирозидан кейин қолдирилганди.
Маданият ва туризм вазири ўринбосари Баҳодир Аҳмедов кремлпараст қўшиқчиларга Ўзбекистонда концерт бериши ёки аксинча чеклов қўйилиши бўйича изоҳ берганди.
У Ўзбекистонда санъатга тўсиқнинг ўзи йўқлиги, концертлардан тушган маблағлар урушга йўналтирилиши ҳақидаги гаплар ҳақиқатдан йироқлигини айтганди.
Нега ҳамма фестивални ўтказишдан бош тортмоқда?
Фестивальда ўз қўшиқлари билан иштирок этадиган хонандаларнинг аксарияти рус шоу-бизнеси вакиллари ҳисобланади. Улар орасида Григорий Лепс, Филипп Киркоров, Тимати, Олга Бузова, Сергей Лазарев каби Россиянинг Украинадаги урушини очиқдан-очиқ қўллайдиган қўшиқчилар ҳам бор. Шу сабабли мезбон мамлакат фуқаролари ижтимоий тармоқларда фестивалга қарши кенг кўламли виртуал норозилик аскиялари уюштирган. Уларнинг фикрича, россиялик санъаткорларнинг Қозоғистондаги чиқишлари республика “Украинадаги урушни қўллаб-қувватлашини” билдиради.
Маълумот ўрнида, Григорий Лепс 23-октябрда Ўзбекистонда концерт беришни режалаштирган. Бунга ўзбекистонлик кўплаб фаоллар қаршилик билдираётганига қарамай, ҳозирча тадбир бекор қилингани йўқ.
Лепснинг Қозоғистонда 8 июль куни бўлиб ўтиши режалаштирилган концерт дастури ҳам маҳаллий фаолларининг норозилигини келтириб чиқарганди ва тадбир бекор қилинганди.
Изоҳ (0)