Қирғизистонда депутат Ўзбекистондаги авиачипта нархи анча арзон эканини айтди 

Қирғизистонда депутат Омурбек Бакиров Жогорку Кенеш йиғилишида маҳаллий рейслар учун авиачипталар аҳоли учун жуда қимматлигини айтди. Бу ҳақда 24.кг хабар берди.

Депутатнинг сўзларига кўра, Бишкек—Ўш йўналиши учун чипта 3 900 сом (44,57 доллар) туради.

“Масалан, Ўзбекистонда ички рейслар учун авиачипталар 8-20 доллар туради. Бу 1 минг 780 сом. Тошкент — Абу-Даби 22 доллар, Бишкек — Абу Даби эса 49 доллардан, яъни 4 655 сом. Ўшга қараганда Абу-Дабига учиш арзонроқ, чипталар нархида унчалик фарқ йўқ”, — деди Бакиров.

Шунингдек, у йўлларда тез-тез содир бўлаётган бахтсиз ҳодисалар туфайли одамлар самолётлардан фойдаланишга ҳаракат қилаётганини айтди. Депутат сайёҳлик мавсумида Ўш, Жалолобод ва Боткенга парвозлар нархини пасайтиришни таклиф қилди.

“Битта компания монополия ўрнатгани учун чипталар нархи қимматроқ. Лекин аҳоли учун авиақатнов иқтисодий томонлама қулай эмас”, — деди депутат.