Моргенштернга Қирғизистонда концерт қўйишга рухсат берилмади

Моргенштернга Қирғизистонда концерт беришга рухсат берилмади. Бу ҳақда Orda.kz хабар берди.

Бишкекда Моргенштерннинг АLGА FESТ фестивали доирасида 23 июнга белгиланган концерти кўплаб шикоятлар ортидан бекор қилинди. 

“Яқинда ижрочи Алишер Моргенштерннинг чиқишига қарши бўлган фаоллар норозилик акцияси ташаббуси билан чиқди. Мана бир ҳафтадан бери ҳар куни санъаткор ва ташкилотимизга таҳдидли хабар ва қўнғироқлар келяпти.

Бугун эса норозилик тўлқини Маданият вазирлигига ҳам етиб келди ва бу масала Жогорку Кенешда ҳам кўтарилди. Афсуски, Алишернинг концертини бекор қилишга мажбур бўлдик”, — дейди АLGА FESТ ташкилотчилари.

Аввалроқ Бишкекда Россиянинг “Порнофильми” ва “Би-2” гуруҳларининг концертлари ҳам бекор қилинган эди. Эътиборли жиҳати, Россияда уларнинг барчаси хорижий агентлар деб аталади.

Маълумот учун: Моргенштерн — россиялик реп ва эстрада артисти, мусиқачи, шоумен.

У 2017 йилда YouTube’да ўша пайтдаги машҳур санъаткорларга пародия қилиш орқали шуҳрат қозонган.

2022 йилнинг февралида Моргенштерн ижтимоий тармоқларда гиёҳванд моддалар савдосида айбланганидан кейин Россияни тарк этган.

Россияда унга нисбатан Жиноят кодексининг 330,1-моддаси 2-қисми (бир йил давомида икки марта маъмурий жавобгарликка тортилганидан кейин шахс томонидан чет эл агенти фаолияти тартибини бузиш) бўйича жиноий иш очилган.

Тергов маълумотларига кўра, у ўзининг Telegram-каналидаги постларида хорижий агент мақомини кўрсатмаган.

Моргенштерн Дубайга кўчиб ўтган ва у ерда Россиядаги мулкини сотиб, Форс кўрфазидан уй сотиб олган.