26 июнь куни кечқурун Россия президенти Владимир Путин халққа мурожаат қилиб, “Вагнер” асосчиси Евгений Пригожин томонидан уюштирилган қуролли исёнга изоҳ берди.
Мурожаат чоғида Путин “Вагнер” ёлланма аскарларидан қора ниятда фойдаланишга уринишганини айтди. Россия президенти “вагнерчи”ларга Россия Мудофаа вазирлиги ёки бошқа ҳуқуқ-тартибот идоралари билан шартнома имзолашни, ўз оилаларига қайтишни ёки Беларусга кетишни таклиф қилди.
“Ким хоҳласа, Беларусга кетиши мумкин. Мен берган ваъда амалга ошади. Такрор айтаман, танлов сизники, аммо бу ўз фожиали хатосини тушунган россиялик аскарларнинг танлови бўлишига ишонаман”, — деди Путин.
Мурожаат чоғида Россия президенти исён ташкилотчилари ўз ватанига, халқига ва “жиноятга жалб этилганлар”га хиёнат қилганини таъкидлади, аммо ташкилотчилар, хусусан Пригожиннинг исмини тилга олмади.
“Қуролли исён ҳар қанақасига бостирилган бўларди. Қўзғолон ташкилотчилари, адекватлигини йўқотган бўлса ҳам, буни тушуниб етмади”, — деди Путин.
Президент нутқи давомида Россия ҳарбийлари, ҳуқуқ-тартибот ва махсус хизматларига миннатдорлик билдирди. Мурожаатда Путин исён пайтида ҳалок бўлган Мудофаа вазирлиги учувчиларини алоҳида тилга олди.
“Қурбон бўлган қаҳрамон учувчиларнинг жасорати ва фидойилиги Россияни фожиали оқибатлардан қутқарди”, — деди Путин.
Россия президентининг мурожаати беш дақиқадан сал кўпроқ давом этди.
Эслатиб ўтамиз, 23 июнь куни “Вагнер” асосчиси Евгений Пригожин ўз ёлланма аскарлари иштирокида Москвада “адолат марши” ўтказишини эълон қилди. Пригожиннинг сўзларига кўра, маршнинг мақсади — бошқа кўнгилли тузилмалар сингари Россия Мудофаа вазирлиги билан шартнома тузиш таклиф қилинган “Вагнер” гуруҳи парчаланишининг олдини олиш эди.
24 июнь куни кечқурун Пригожин Александр Лукашенко билан музокаралардан сўнг ёлланма аскарлар “режа бўйича дала лагерларига қайтишини” айтди. Федерал хавфсизлик хизмати Пригожинга қарши қуролли исён бўйича иш очди, ушбу модда 20 йилгача қамоқ жазосини назарда тутади.
Изоҳ (0)