Афғонистоннинг Зобул вилояти маркази Қалат шаҳрида йўловчи автобуси ва юк машинаси тўқнашиб кетди. Йўл транспорт ҳодисаси оқибатида 9 киши, жумладан, аёллар ва эркаклар ҳалок бўлди, 31 киши жароҳатланди. Бу ҳақда “Дарё”нинг Афғонистондаги мухбири хабар берди.
Ҳодиса 8 июнь куни эрталаб Қалат шаҳрининг Пули санги ҳудудида содир бўлди. Бу Афғонистонда сўнгги 24 соат ичида юз берган иккинчи авария.
7 июнь куни Афғонистон шимолидаги Сарипул вилоятининг Саяд туманида енгил автомобилнинг йўлдан чиқиб, ағдарилиб кетиши оқибатида 24 киши ҳалок бўлганди. Қурбонларнинг саккиз нафари болалар.
Аввалроқ Сарипул вилоятидаги иккита мактабда 80 нафар қиз ва аёл ўқитувчилар заҳарлангани ҳақида хабар берилганди. Бирлашган Миллатлар Ташкилотининг Афғонистондаги Болалар жамғармаси (UNICEF) ўқувчи ва ўқитувчилар заҳарланишидан хавотир билдирди ва тергов ўтказишни талаб қилди. UNICEF “Толибон” муваққат ҳукумат расмийларидан воқеани тўлиқ тергов қилишга, аёллар ва қизларни ҳимояга олишга чақирди.
Айрим маълумотларга кўра, заҳарланиш аломатлари орасида диарея, кўнгил айниши, бош айланиши, юрак уриши ва нафас олиш қийинлашиши қайд этилган. Ҳозирда 24 нафар қиз шифокорлар назорати остида экани таъкидланмоқда.
Изоҳ (0)