АҚШ Давлат котиби Энтони Блинкеннинг айтишича, Хитой разведкасининг учинчи давлатлар орқали маълумот тўплашга уринишлари Вашингтон ва Пекин ўртасидаги зиддият мавзулари рўйхатини кенгайтирмоқда. 12 июнь куни у Хитой анчадан бери Флорида штатининг жанубидаги Кубадан туриб АҚШ тўғрисида маълумот тўплаётганини таъкидлади ва шу тариқа ОАВ маълумотларини тасдиқлади.
Блинкеннинг айтишича, АҚШ президенти Жо Байден 2021 йил бошида лавозимга киришгач, унинг маъмурияти Пекин ҳарбий разведка маълумотларини йиғиш учун бутун дунё бўйлаб логистика базасини кенгайтиришга уринаётганидан хабар топган. Жумладан, 2019 йилда Хитой “Кубада разведка маълумотларини йиғиш институтларини янгилаган”, деди у. Давлат котибининг сўзларига кўра, Байден маъмурияти аввалги маъмуриятнинг баъзи саъй-ҳаракатларига қарамай, ХХРга нисбатан етарлича чоралар кўрилмаган, деган хулосага келган, шу боис амалдаги президент бевосита жавоб ҳаракатларини бошлашни буюрган.
Ўшандан бери расман эълон қилинмаган бўлса-да, етарлича натижа берган қатор чоралар кўрилди, деди Блинкен тафсилотга тўхталишни истамай. У, шунингдек, Вашингтон Хитой разведка базаларини ўз ҳудудида жойлаштиришни ўйлаётган давлатлар ҳукуматлари билан алоқада эканини таъкидлади. “Мутахассисларимизнинг фикрича, дипломатик саъй-ҳаракатларимиз ХХРнинг бу уринишларини секинлаштирган”, — деди у.
Хитой разведка агентликлари Кубада жосуслик қилаётгани ҳақида ОАВ хабар бермоқда
Аввалроқ The Wall Street Journal, Politico ва бошқа нашрлар АҚШ маъмуриятидаги манбаларига таяниб, Кубада Хитой разведка хизматлари АҚШга оид маълумотларни тўплайдиган база мавжудлигини хабар қилганди. WSJ таъкидлаганидек, Куба Америка қирғоқларига яқинлиги туфайли Хитой у ердан туриб Қўшма Штатларнинг айрим ҳудудларидаги электрон алоқаларни тутиб олиш, шунингдек, Америка кемаларининг ҳаракатини кузатиш имкониятига эга.
10 июнь куни АҚШ маъмурияти вакили ушбу база Байден лавозимга киришишидан олдин ташкил этилганини, бу муаммо анчадан бери давом этаётгани, Вашингтон эса уни ҳал қилиш учун ҳаракат қилаётганини таъкидлади.
Блинкен яқин кунларда Хитойга ташриф буюриши мумкин
ОАВнинг тасдиқланмаган хабарларига кўра, Энтони Блинкен шу ҳафта Хитойга ташриф буюради. У Хитой расмийлари билан ХХР разведкаси масаласини муҳокама қилади, деб қайд этади Politico. Блинкен Пекинга бориш режаларини ҳали тасдиқламади.
Изоҳ (0)