Россиянинг тактик ядровий қуролларини Беларусда жойлаштириш 7-8 июль кунлари улар учун иншоотларни тайёрлаш тугагандан сўнг дарҳол бошланади. Бу ҳақда “РБК” хабар берди.
Россия президенти Владимир Путин 9 июнь куни Сочида Александр Лукашенко билан учрашувда бу ҳақда гапирди. Путин хавфсизлик нуқтаи назаридан вазият барқарорлиги, “ҳатто яхши” эканини айтди. У Россия ва Беларусь бу соҳада ишончли ҳамкорлик қилаётганини таъкидлади.
Бунгача Россия президенти Москва Беларусда ядровий қурол сақлаш омбори қурилишини 1 июлга қадар якунлашини айтган эди.
Беларусда ядровий қурол жойлаштирилиши
25 май куни Минскда Россия мудофаа вазири Сергей Шойгу ва Беларусь мудофаа вазирлиги раҳбари Виктор Хренин ўртасида учрашув бўлиб ўтди, унда стратегик бўлмаган ядро қуролларини Беларусь Республикасига жойлаштириш тўғрисидаги ҳужжат имзоланди.
“Россия Беларусга ядро қуролини бермаяпти: улар устидан назорат ва улардан фойдаланиш бўйича қарор Россия томонида қолади”, — деди Шойгу.
Шунингдек, у, Москва ҳарбий-сиёсий вазиятни ҳисобга олган ҳолда, келажакда “Иттифоқ давлати хавфсизлигини таъминлаш бўйича қўшимча чоралар” кўриш ниятида эканини айтди. Россия мудофаа вазири аллақачон кўрилган чоралар барча мавжуд халқаро-ҳуқуқий мажбуриятларга мос келишини билдирди.
Ўша куни Александр Лукашенко Минск Россиядан келаётган ядро қуроллари хавфсизлиги учун масъул эканини таъкидлади ва унинг мамлакати ҳудудига ҳеч қандай диверсантлар кира олмаслигини айтди.
26 май куни Украина президенти девони раҳбари маслаҳатчиси Михаил Подоляк Россиянинг қўшни Беларусда ядро қуролини жойлаштириши Ядро қуролини тарқатмаслик тўғрисидаги шартномани бузиш эканини билдирди.
Изоҳ (0)