Украина қарши ҳужумининг якуний мақсади барча босиб олинган ҳудудларни, жумладан Қримни қайтаришдир. Бу ҳақда Украина президент офиси раҳбарининг ўринбосари Игорь Жовква CNN телеканалига берган интервьюсида айтиб ўтди.
Жовква баъзи йўналишларда қарши ҳужум аллақачон бошланганини айтди, аммо тафсилотларга тўхталмади. Дипломат, шунингдек, кўзланган мақсадларнинг барчасига эришиш учун ойлаб вақт кетиши мумкинлигини таъкидлади.
У ушбу ҳаракатлар Украина армиясининг биринчи қарши ҳужуми эмаслигини эслатди — ўтган йили Россия қўшинлари Харьков ва Херсон вилоятлари ҳудудидан сиқиб чиқарилганди.
Ҳозирги ҳужум охиргиси ҳам бўлмаслиги мумкин, деб қўшимча қилди у ва Украинага кўпроқ артиллерия ҳамда ўқ-дорилар кераклигини таъкидлади.
Украинанинг қарши ҳужуми — ҳозиргача нималар маълум?
10 июнь куни Украина президенти Владимир Зеленский мамлакатда қарши ҳужум ва мудофаа ҳаракатлари олиб борилаётганини айтди, бироқ қайси босқичда эканига аниқлик киритмади.
Украина Мудофаа вазирлигининг 12 июндаги ҳисоботига кўра, украиналик ҳарбий хизматчилар бир ҳафта ичида Донецк ва Таврининг оператив туманларидаги еттита аҳоли пунктини озод қилган.
Британия мудофаа парламенти яқин келажакда “Донбасснинг у ёки бу қисмида катта ҳужум” кутилаётганини хабар қилди.
Изоҳ (0)