АҚШнинг собиқ президенти Дональд Трамп 2024 йилда бўлиб ўтадиган АҚШ президентлик сайловларида ғалаба қозонишини ва “Жо Байден исмли коррупционер президент”ни Оқ уйдан ҳайдаб чиқаришини айтди. Бу ҳақда у Шимолий Каролинада Республикачилар партияси аъзолари олдидаги чиқиши чоғида айтди.
“2024 йил 5 ноябрда биз коррупциялашган сиёсий тузумга қарши турамиз. Биз Жо Байден исмли бутунлай коррупцияга ботган президентни Оқ уйдан ҳайдаб чиқарамиз”, — деди Дональд Трамп.
У "ҳеч қачон таслим бўлмаслигини" ва "ҳеч қачон мағлуб бўлмаслигини" қўшимча қилди.
АҚШда президентлик сайловлари 2024 йил ноябрида бўлиб ўтади. Республикачилар партиясидан 14 номзод иштирок этиши кутилмоқда. Дональд Трамп, Флорида губернатори Рон Десантис, Жанубий Каролина сенатори Тим Скотт, бизнесмен Вивек Рамасвами, Арканзас губернатори Аса Хатчинсон, АҚШнинг БМТдаги собиқ элчиси Никки Хейли ва радио бошловчиси Ларри Элдер пойгада иштирок этишларини маълум қилди. Дональд Трамп Республикачилар партиясининг праймериздаги ғалабаси учун асосий даъвогар ҳисобланади.
Апрель ойида Дональд Трампга биринчи даражали иш юритувига оид ёзувларни сохталаштиришда 34 та айблов қўйилган эди. Прокуратурага кўра, қалбакилаштиришлардан мақсад унинг 2016 йилда сайланишига халақит бериши мумкин бўлган маълумотларни яшириш бўлган. Суд жараёни 2024 йилда бошланиши керак.
Шунингдек, 9 июнь куни Дональд Трампга яна 37 та банд, жумладан махфий ҳужжатларга ноқонуний эгалик қилиш ва адолатга тўсқинлик қилиш мақсадида тил бириктириш бўйича айблов қўйилди. Унга ўн йиллик қамоқ жазоси хавф солмоқда.
Изоҳ (0)