Каховка ГЭСнинг вайрон бўлиши сабабли 700 минг аҳоли ичимлик суви танқислигига дуч келиши мумкин.
Шунингдек, ГЭСнинг бузилиши Украинадан озиқ-овқат экспортининг камайишига ва бутун дунё бўйлаб озиқ-овқат нархининг ошишига олиб келади. Бу ҳақда Бирлашган Миллатлар Ташкилоти бош котибининг гуманитар масалалар бўйича ўринбосари Мартин Гриффитс маълум қилди.
Унинг сўзларига кўра, КаховкаГЭС вайрон бўлгач, Украинадаги гуманитар вазият кескин ёмонлашган. “Биз бу ҳалокатнинг тўлиқ оқибатларини эндигина кўришни бошлаяпмиз”, — деди Гриффитс.
Мартин Гриффитснинг қўшимча қилишича, БМТ ГЭС вайрон бўлганидан кейин сув тошқини зонасида қолган Украина назоратидаги вилоятларнинг 30 мингга яқин аҳолисига ёрдам кўрсатган. Шунингдек, у Россиянинг БМТдаги доимий вакили Василий Небензя билан жабрланганларга ёрдам кўрсатиш учун Россия назоратидаги ҳудудларга БМТ ходимларини қабул қилиш масаласини муҳокама қилиш учун учрашув ўтказилишини эълон қилди.
“Аммо бунинг ортида 700 000 киши учун сифатли ичимлик суви етишмаслиги каби катта муаммо турибди”, — деди Гриффитс. Унинг сўзларига кўра, бу Россия ва Украина назоратидаги ҳудудларда сув танқислигига дуч келиши мумкин бўлган аҳолининг умумий сони.
Изоҳ (0)