Туркияда ўтказилган “Энг илғор мерган” халқаро мусобақасида Ўзбекистон Мудофаа вазирлиги мерганлари жамоаси иккинчи ўринни қўлга киритди. Бу ҳақда вазирлик матбуот хизмати “Дарё”га маълум қилди.
Маълум қилинишича, Испарта шаҳридаги “Командо” тоғ ўқув машқлар марказида ўтказилган мусобақада Испания, Покистон, Қатар, Бирлашган Араб Амирликлари сингари ўндан ортиқ давлатлар вакиллари иштирок этган.
Мусобақа давомида “Қайиқдан ва миноралардан ўқ отиб оролни ҳимоя қилиш”, “Вертолёт ва ердан жанг олиб бориб, ярадорни эвакуация қилиш”, “Ҳаракатланувчи нишонларни пистолетда яксон этиш”, “Тунги вақтда магнит азимути бўйича ҳаракатланиш” каби қатор шартлар реал жанг вазиятига яқинлаштирилган ҳолда олиб борилган.
Қарийб 10 кун давом этган беллашувларда хорижий давлат армияларининг 42 та жамоаси ичида Ўзбекистон Мудофаа вазирлиги ҳарбий хизматчилари фахрли 2-ўринни қўлга киритган. Шоҳсупанинг биринчи ва учинчи ўринлари мезбон давлат вакилларига насиб этган.
.jpg)
Март охирларида Ўзбекистон Мудофаа вазирлиги ҳарбий хизматчилари АҚШда бўлиб ўтган “Энг илғор жангчи — 2023” мусобақасида ғолиб бўлганди. Шунингдек, Ўзбекистон ҳарбий шифокорлари Жанубий Кореядаги халқаро курсларда малака ошириши, Ўзбекистон армияси дунёдаги энг кучли армиялар рейтингида 62-ўринни эгаллагани тўғрисида хабар берилганди.
Изоҳ (0)