Тошкент шаҳар адлия бошқармаси собиқ мансабдорларига нисбатан жиноят иши қўзғатилгани ҳақида хабар берилган эди. Вазирлик ҳолат юзасидан муносабат билдирди.
Унга кўра, вазирликнинг ички аудит хизмати 2022 йил декабрь – 2023 йил февраль ойларида 2019-2022 йилларда давлат хизматлари кўрсатишда нотўғри тўланган ёки хизматдан фойдаланилмаган маблағларни юридик ва жисмоний шахсларга қайтаришда белгиланган тартибга риоя этилиши ўрганилган. Ўрганишда собиқ Давлат хизматлари агентлиги Тошкент шаҳар бошқармасида 864 миллион сўм ва Самарқанд вилоят бошқармасида 394 миллион сўм жисмоний ва юридик шахсларга қайтариши лозим бўлган маблағлар айрим бухгалтерия ва давлат хизмати маркази ходимлари томонидан ўзлаштирилгани аниқланган.
Кўрилган чоралар натижасида ўзлаштирилган маблағлар тўлиқ қайтарилиши таъминланган. Айбдор 7 нафар ходим лавозимидан озод этилган ҳамда жиноий жавобгарлик масаласини ҳал этиш учун тўпланган материаллар шу йил февраль ойида прокуратура органларига юборилган.
“Адлия тизимида фаолият юритаётган ҳар бир ходим ўз вазифасини ҳалол ва виждонан бажариши энг юксак қадрият ҳисобланади. Бу қадриятга риоя қилмаган ҳар қандай ходимга нисбатан кескин чоралар кўрилади”, — дейилади хабарда.