Тошкент ҳарбий округининг “Ангрен” дала ўқув майдонида Ўзбекистон ва Қозоғистон Қуролли кучлари махсус бўлинмалари ҳамкорлигидаги “Қалқон-2023” махсус-тактик ўқувларининг асосий фазаси бўлиб ўтди. Мазкур жараённи ҳар икки мамлакат мудофаа вазирлари бевосита кузатди.
Ўқув режасига мувофиқ ҳарбий хизматчилар Чегара қўшинларининг тезкор куч ва воситалари билан ҳамкорликда шартли душманни яксон этиш бўйича ҳаракатлар бошлади. Дастлаб махсус бўлинмалар учувчисиз учиш қурилмаларидан фойдаланган ҳолда разведка-қидирув ҳаракатларини олиб бориб, душман йўналишини аниқлади.
Шундан сўнг шартли душман жойлашган ҳудуд миномётлар ёрдамида ўққа тутилди. Maxсус бўлинмалар замонавий қуролли можаролар тажрибасидан келиб чиққан ҳолда янги тактик усулдан фойдаланди. Бунда белгиланган вазифани бажариш вақтида оловли қўллаб-қувватлов гуруҳига енгил зирҳланган автомобиллар, жанговар вертолётлар ҳамроҳлик қилди ва шартли душман батамом яксон этилди.
“Ҳамкорликдаги жанговар ҳаракатлар тажрибаси бугунги кунда артиллерия ҳисобларининг мустақил ҳаракати муҳим аҳамиятга эга эканини кўрсатиб берди. Ҳамкорликдаги ўқувлар давомида ҳарбий хизматчиларнинг юқори касбий тайёргарлиги, бирдамлиги ва топширилган вазифани аъло даражада уддалашга қодир эканликлари намоён бўлди. Шунингек, Қозоғистон Мудофаа вазирлиги делегацияси Ангрен шаҳридаги ҳарбий қисмлардан бирига ташриф буюриб, у ерда яратилган шарт-шароитлар билан танишди”, — дейилади хабарда.
Изоҳ (0)