O‘zbekiston harbiylari AQSHdagi musobaqada g‘olib bo‘ldi

Mudofaa vazirligi harbiy xizmatchilari AQSHda bo‘lib o‘tgan “Eng ilg‘or jangchi — 2023” musobaqasida g‘olib bo‘ldi, deb xabar bermoqda vazirlik matbuot xizmati.

Ma’lum bo‘lishicha, 17—24-mart kunlari AQSHning Missisipi shtati, Camp Shelby harbiy o‘quv bazasida o‘tkazilgan ushbu musobaqada kichik serjantlar — Anvar Tursunov va Azamat Kenjayev AQSH Milliy gvardiyasining Maxsus bo‘linmalari harbiy xizmatchilari bilan kuch sinashdi.

Musobaqa davomida harbiy xizmatchilar yakka tarkibda jismoniy tayyorgarlik sinovlari (6 ta mashqni o‘z ichiga olgan Fitnes test), jismoniy va ruhiy zo‘riqish yo‘lagidan o‘tish, tunda 15 kilometr masofaga oriyentirlash, 15 kilo yuk bilan 20 kilometr masofaga marsh yugurish, jangovar va umumiy tayyorgarlik bo‘yicha test sinovlari, insho yozish (harbiy hamkorlik mavzusida 500 tadan kam bo‘lmagan so‘z), artilleriya olovini boshqarish, AQSH namunasidagi o‘qotar qurollarni noto‘liq qismlarga yoyish, yig‘ish va jangovar holatga keltirish, shuningdek, ulardan turli usul va sharoitlarda o‘q otish, tibbiy tayyorgarlik, ommaviy qirg’in qurollaridan himoyalanish, kutilmagan mashqlar kabi shartlarni muvaffaqiyatli bajardi.

O‘zbekistonlik harbiy xizmatchilar 15 kilogramm yuk bilan 20 km masofaga marsh yugurish shartini 1 soat 54 daqiqa ichida bajarib  musobaqa rekordini yangiladi.

Ushbu musobaqa xalqaro harbiy hamkorlik aloqalarini mustahkamlash va maxsus bo‘linmalarda xizmat qilish nufuzini oshirish kabi maqsadlarda tashkil etilgan.

G‘olib harbiy xizmatchilar Toshkentda tantanali ravishda kutib olingan.