Оқ қумли пляжлар, флора ва бой сувости фаунаси билан ажралиб турувчи, оролнинг ўзгача гўзаллигини, тинч дам олиш ва сувости спортини севувчилар учун ажойиб маскан сифатида Таиланднинг Пхукет ва Краби оролларини мисол қилишимиз мумкин.

Таиланднинг Пхукет ва Краби оролларининг энг экзотик масканлари ва диққатга сазовор манзилларида 27 май—1 июнь кунлари медиа тур ташкил қилинди.

Бу ернинг табиати, экзотик дарахтлари ва тиниқ денгиз соҳиллари, корал ва рифли денгиз сайёҳларни жалб қилади. Асосан, Пхукет русийзабон туристлар орасида машҳурлиги учун у ерда рус тилида сўзлашувчи кам сонли аҳолини учратиш мумкин ва барча саволларингизга жавоб топа оласиз.

Аҳоли қатламини инглиз, хитой, корейс ва кам сонли рус тилида сўзлашувчилар ташкил қилса-да, у ерда турли миллат вакилларини учратасиз.

Таиланд ҳақида қисқача

Таиланд — Жануби-Шарқий Осиёда, Ҳиндихитой яриморолининг марказий қисми ва Малакка яриморолининг шимолий қисмида жойлашган давлат ҳисобланади. Майдони 514 минг км². Аҳолиси 65,4 млн киши. Пойтахти — Бангкок шаҳри. Маъмурий жиҳатдан 76 вилоят (“чангвад”)га бўлинади.

Медиа тур Пхукет аэропортига қўниш ва спринтерда орол бўйлаб манзилга йўл олишдан бошланди. Дастур бўйича бир нечта орол ва диққатга сазовор манзиллар танланган. Пхукет оролининг узунлиги 50 км, кенглиги эса атиги 21 км. Пхукет соҳиллари Ҳинд океанининг Андаман денгизи томонидан ювилади.

Дам олиш маскани танлашда шубҳасиз фойдали бўлган муҳим фактлар:

• Бепул кириш. Оролда биронта хусусий пляж йўқ, шунинг учун сиз ҳар қандай, ҳатто энг яқин меҳмонхонанинг йўли бўйлаб жойлашган қирғоқни танлашингиз мумкин.
• Барча энг яхши пляжлар. Пхукетнинг ғарбий томонида жойлашган, муваффақиятли дам олиш учун барча зарур инфратузилма мавжуд.
• Дам олиш нархи. Бу фақат сайёҳнинг имкониятларига боғлиқ. Кунига 3 000 баттдан (1 миллион сўм) қимматга тушадиган меҳмонхоналар ҳам мавжуд. Лекин оролдаги барча меҳмонхоналар деразаси гўзал қирғоқ манзарасига очилади.

Краби ороли 

Сайёҳлар учун қизиқ бўлган яна бир нуқта — Краби ороли бўлиб, Пхукетдан 2 соатлик манзил ҳисобланади.

Бу оролда 1999 йилдан бери халқаро аэропорт мавжуд бўлиб, у ерга Ўзбекистон—Дубай—Пхукет маршрути бўйича саёҳат қилишингиз мумкин. Орол жами 359,61 киши яшайдиган саккизта туманга бўлинган.

Бу тоғли ва сувли ҳудудларда манров, касси, манго, палма, резина ва ҳатто кофе дарахтлари мавжуд бўлган 130 оролдан иборат маскан. Пляжлардан ташқари, Краби табиий боғларга эга ва дам олиш учун қулай инфраструктурага эга. 

Маржон ороллар, оқ қум, тиниқ сув ва ажойиб ландшафтлар ушбу оролни Крабига келувчи сайёҳлар орасида оммалаштирган.

Оролнинг диққатга сазовор жойлари

1. Тхам ғори — Крабидан 7 км узоқликда жойлашган.
2. Кхао миллий парки — 20 км узоқликда жойлашган, қалин ва баланд дарахтлари, виқорли тоғлари, иссиқ булоқлари, ёввойи ҳайвон ва шаршаралари билан машҳур. Бу боғни тўлиқ айланиб чиқиш учун 3 кун кетади.
3. Ват Клонг Тхам музейи — тошасридан қолган асбоблар, қадимий лой буюмлар ва 5 000 йиллик тарихга эга маржонлар сақланади.
4. Намток шаршараси — ҳайвонот боғи Кхао-Пра банг Кхҳам ва жуда кўп пляжлар.

Нима билан шуғулланиш мумкин

• Қайноқ булоқларда чўмилиш. Намток шаршараси энг қулай локация ҳисобланади.
• Каякинг — ботқоқли ўрмон ичра қайиқда сузиш ва атрофдаги гўзалликдан баҳраманд бўлишингиз мумкин. Асосийси илк марта қайиқда сузаётганлар ва профессионаллар ҳам бу манзарани бир нафасда, сузиб туриб ҳис қилишлари мумкин.
• Снорклинг ва дайвинг — бу спорт тури учун зарур бўлган “кийимларни” ижарага — кунига 150 батт (50 минг сўм) олишингиз мумкин.
•  Велосипедда учиш — қумли соҳилда алоҳида вело йўлак бўйлаб табиат гўзаллигини ҳис қилишингиз мумкин.
•  Қояларга чиқиш спорти (скалолазание) — 150 та турли маршрут билан танишишингиз мумкин, ва албатта тажрибасиз спортчилар ҳам фойдалана олади. Гид ва мастер класлар текин ўтилади.

Таиланд ҳақида 10 та қизиқарли факт

1. Таиланд — Осиёдаги энг эркин мамлакат

“Таиланд” тай тилида “Пратхет Тхай” дея янграйди, бу эса “озодлар ўлкаси” демакдир. Бу европаликлар томонидан ҳали мустамлакага айлантирилмаган Жануби-Шарқий Осиёдаги ягона мамлакатдир.

2. Таиланд қироли — халқ орасида севимли бўлган монархлардан бири

Таиландликлар Пхумипон Адулядетни кўп сабабларга кўра яхши кўради. У сунъий булутлар яратиш учун патентга эга. У кўприк ва тўғонларни ишлаб чиққан, саксофонни маҳорат билан чалади, мамлакатнинг миллий мадҳиясини ёзган ва истеъдодли рассом ҳамдир.

3. Таиландда ҳозир 2565 йил

Таиландликлар йил ҳисобини Будда туғилган вақтдан бошлайди.

4. Вақт 6 соатли шкалада ҳисобланади

Дунёнинг кўплаб мамлакатларида вақтни 12 ёки 24 соатли шкала билан ҳисоблашади, Таиланднинг катта қисми эса кунни 6 соатлик тўртта чоракка бўлган ҳолда яшайди.

5. Дунёдаги энг узун номли шаҳар Таиландда жойлашган

Таиланд пойтахти — Бангкокнинг тўлиқ номи “Крунг Тхеп Маханакхон Амон Раттанакосин Махинтараюттхая Махадилок Пхоп Ноппарат Ратчатхани Буриром Удомратчанивет Махасатан Амон Пиман Аватан Сатит Саккатхаттийя Вицанукам Прасит” бўлиб, у “Фаришталар шаҳри, абадий яшайдиганларнинг буюк шаҳри, тўққизта қимматбаҳо тошнинг буюк шаҳри, Вишвакарман томонидан Индра амри билан қурилган, қиёфасини ўзгартирган худо яшайдиган ибодатхонани эслатувчи улкан Қироллик саройи жойлашган, фаровон ва бахтли шаҳар” деган маънони англатади.

6. Таиланднинг Гиннес рекордлари

Таиландда Будданинг энг катта олтин ҳайкали, энг йирик тимсоҳ фермаси, энг катта ресторан ва энг баланд меҳмонхона жойлашган.

7. Дунёдаги энг митти сут эмизувчи

Дунёдаги энг кичик сут эмизувчи бўлган чўчқабурун кўршапалак ҳам Таиландда яшайди, унинг оғирлиги тангадан ҳам енгил.

8. Сиам мушуклари — асли Таиланддан

Сиам мушуклари ватани Таиланддир, у қадимда Сиам деб номланган. XIV аср китобларида Сиам мушукларининг 23 та тури тилга олинган, ҳозирда эса 6 хил зот қолган холос.

9. Будда монахлари

Авваллари Таиландда барча йигитлар, жумладан, қирол ҳам 20 ёшга тўлгунича қисқа муддатга бўлсада будда монахи бўлиб кўриши керак эди. Бу одатга бугунги кунда ҳам кўпчилик риоя қилади.

10. Бош — тананинг энг муҳим қисми

Шу туфайли, мамлакатда биров, ҳатто, чақалоқнинг ҳам бошига қўл теккизиш мумкин эмас.

Мухлиса Юсупова