Афғонистондаги қуролли тўқнашувда бир оиланинг 8 аъзоси ҳалок бўлди

14 апрель куни Афғонистоннинг Пактика вилоятидаги қуролли тўқнашувда тўққиз киши ҳалок бўлди. Бу ҳақда “Дарё”нинг мамлакатдаги мухбири хабар берди.

Пактика вилоятидаги маҳаллий ахборот манбаларининг хабар беришича, вилоятнинг Хайркот туманида “Толибон” ва қуролланган шахс ўртасидаги тўқнашувда тўққиз киши, жумладан, бир оиланинг саккиз аъзоси ҳалок бўлган.

Манбаларга кўра, бу можаро “Толибон” кучлари жиноятчини қўлга олиш мақсадида уйга операция бошлаганида содир бўлган. Икки томон ўртасидаги тўқнашувда бир оиланинг саккиз нафар аъзоси, жумладан, аёллар ва болалар ҳамда қуролланган шахс ҳалок бўлган.

Қурбонлар орасида беш бола, бир ўғил ва бир қиз ҳамда уч аёл борлиги айтилмоқда. Манбаларнинг қўшимча қилишича, қуролланган шахс бировнинг уйига югуриб кирган ва ўзини қутқариш учун бу оила аъзоларини гаровга олган.

Оиланинг саккиз аъзоси қуролланган шахс ёки “Толибон” кучлари отишмаси оқибатида ҳалок бўлганми-йўқми ҳозирча аниқланмаган. Афғонистоннинг Пактика вилоятидаги “Толибон” хавфсизлик ходимлари ҳозирча бу ҳақда ҳеч қандай расмий маълумот бермаган.