Шахмат бўйича Norway Chess—2023 мусобақасининг 2-тур ўйинлари 31 май, чоршанба куни ўтказилди.
Ўзбекистонлик гроссмейстер Нодирбек Абдусатторов 2-турда Норвегия вакили Арян Тарига қарши баҳс олиб борди ва ғалабага эришди.
Дастлабки турда Нодирбек Аниш Гирига қарши дона сурганди. Асосий партия дуранг билан якун топган, армагеддон баҳсида эса Абдусатторов мағлубиятга учраганди.
Ўзбекистон вакили икки турдан кейин 4 очко тўплаган ҳолда Ҳикару Накамура билан бирга 2-ўринда бормоқда. Пешқадам Фабиано Каруана ҳисобида 4,5 очко бор.
Абдусатторов навбатдаги беллашувни Алиреза Фирузжага қарши ўтказади. Партия 1 июнь куни бўлиб ўтади.
.jpg)
Нодирбек мусобақанинг дастлабки кунида ўтказилган блиц баҳсларида ғалаба қозонганди.
Маълумот учун, партияда ғолиб чиққан шахматчи 3 очкога эга бўлади, мағлуб эса — 0. Агар ўйин дуранг билан якунланса, армагеддон баҳси ўтказилади. Унда ғалаба қозонганга 1,5 очко, ютқазган шахматчига эса 0,5 очко берилади. Армагеддон қоидаларига кўра, партияда дуранг бўлса, қора донада ўйнаган шахматчи ғолиб деб топилади.
Изоҳ (0)