Дортмунднинг “Боруссия” жамоаси сафида 2012 йилдан бери ҳаракат қилиб келаётган Марко Ройс яна Германия чемпионлигидан қуруқ қолди. 2022/23 йилги мавсумда “арилар” сафида етарлича майдонга тушмаган бўлса ҳам жамоа сафида кубокни боши узра кўтаришга ундан лойиқроқ футболчи йўқ эди. Ўзи севган клубга содиқлик кўрсатган ярим ҳимоячи 34 ёшга тўлди. Қуйида Ройс Дортмунд клуби асосий таркибига келгунча бошидан кечирганлари ҳақида сўз боради.

Марко Ройс 11 йиллик фаолияти давомида “Боруссия Д” билан ўсди. Ҳозирда уни бошқа бирор клубда тасаввур қилиш қийин. Футболчи жамоа стадиони яқинида туғилган ва яшаган, бутун умри давомида клубга мухлислик қилган, академияда шуғулланган. Бироқ бир вазият сабаб барчаси бошқача бўлиши мумкин эди.

Маркони етти ёшида “Боруссия” академиясига олиб келишган. Ўшанда тумандаги деярли барча унинг қобилиятлари ҳақида билар эди — Ройс мандаринлар билан худди тўп билан бўлгани каби жонглёр қила оларди. Футболчи ўн йил давомида Дортмунднинг ёшлар жамоаларида ҳаракат қилди. Аммо профессионал шартнома имзолашга келганда, 17 ёшли футболчи рад этилган. Ройснинг ўзи бу ҳолатга спортга мос бўлмаган тана тузилиши сабаб бўлган, деб эслайди. Жамоада тортиб кета олмайди деб ҳисоблашган.

“Жуда хафа бўлгандим. Болаликдан академияда шуғулланасан, лекин иш охирги босқичга келганда керак бўлмай қоласан. Ахир бу болалигимдан бери мухлислик қилиб келаётган жамоа. Ўшанда ҳеч қаерга кетишни истамагандим”, — дейди футболчи. 

Кўплаб футболчилар топ клублар академияларидан қуйи лигаларга йўл олади ва ўша ерда қолиб кетади. Марко ҳам шундай ҳолга тушиши мумкин эди. Германиянинг учинчи лигасида ҳаракат қилаётган ва пулсиз қолган “Рот-Вайсс”га йўл олади. Ройс эртагидаги сўнгги саҳифа ҳам бўлиши мумкин эди. Бироқ бундай бўлмади. Аввалига ёшлар жамоасида етакчига айланди ва ҳар икки ўйиннинг бирида гол урди. Кейин эса катта жамоада ҳам лидер бўлди. Натижалар яхшиланди, Ройс ҳаракат қилаётган жамоа учинчи йилда Бундеслига 2 га кўтарилди.

Табиийки, топ клублар скаутлари дарҳол футболчини кузата бошлади. Биринчи таклиф “Боруссия”дан келди. Фақат Дортмунд эмас Мёнхенгладбах шаҳри клубидан. Ройс 2009 йилнинг 25 майида жамоа билан 4 йиллик шартнома имзолайди ва дарҳол асосий таркиб ўйинчисига айланади. 2011/12 йилги мавсумда эса Германияда йилнинг энг яхши футболчиси деб топилади.

Марконинг Мёнхенгладбах клубида узоқ вақт қолмаслигини ҳамма тушунарди. Бунинг учун фақатгина яхши таклиф бўлиши керак эди. Футболчининг хоҳиши эса аниқ эди — Ройс уйига қайтишни хоҳларди. Бу сафар дортмундликлар вазиятни қўлдан бой бермади ва ярим ҳимоячи учун 17 миллион евро тўлашдан қўрқмади. Бу ўша вақтда клубнинг трансфер рекорди бўлганди. Клуб бир оз олдин Германия чемпионига айлангани ва Юрген Клопп билан Чемпионлар Лигасида ёрқин натижа қайд этишга киришганини ҳисобга олганда “Боруссия Д” бундай трансферни амалга оширишга ҳақли эди.

Футболчи Дортмунддаги биринчи мавсумидаёқ 14 та гол урди ва 11 та голли пас берди, Германия чемпионатида 2-ўринни олди ва Чемпионлар Лигасида финалга чиқди. Ройс ўша вақтда дунёнинг энг яхши қанот ҳужумчиларидан бири деб аталганди. Бир қарашда Ройснинг порлоқ келажаги учун мукаммал шароит ҳосил бўлаётгандек эди: “Боруссия”да бир неча йил ҳаракат қилиб, кучлироқ жамоага ўтиш. Ўша вақтдаёқ Дортмунд клуби ҳар мавсумда катта пуллар сарфлаб, рақибнинг энг кучли футболчиларини олиб қўядиган “Бавария”дан ўтиб кета олмаслиги маълум эди. “Боруссия” билан лигада иккинчи ўрин учун ёки Чемпионлар Лигасида узоқроққа бориш учун кураш футболчида мотивация уйғотиши жуда қийин.

2012 йилдан бери ҳар трансфер ойнасида Ройсни дунёнинг деярли барча топ-клублари ўз сафига қўшиб олишни хоҳлагани айтиларди. Булар орасида “Бавария”, “Реал”, “Барселона” ва “Манчестер Юнайтед” каби жамоалар бор эди. Бироқ футболчи барча таклифларни рад этди. Дортмунд клуби футболчиларини ўзида куч билан ушлаб турмайди. Жамоани тарк этган Марио Гётце, Роберт Левандовски, Матс Ҳуммелс каби футболчилар мисолида буни кўриш мумкин. Чемпионликка эриша олмаса ҳам “Боруссия”да қолиш Ройснинг қарори бўлган. Тўғри, Марко кетма-кет жароҳатлар сабаб жуда кўплаб ўйинларни ва терма жамоанинг қатор йирик мусобақаларини ўтказиб юборди.

Марко 2019 йилда жамоадан кетиши ҳақидаги саволларга узил-кесил нуқта қўйди. Ўша вақтда футболчига “Бавария”дан қизиқиш бўлаётгани ҳақида миш-мишлар тарқаганди. Ройс эса бунга дарҳол жавоб берди.

“Бавария”га ўтаманми? Ҳеч қачон! Мени ҳеч қачон “Бавария”да кўрмайсиз. Бунга ваъда бераман, — деди ва ўз сўзида турди.

Марко Ройс 34 ёшга тўлди. “Боруссия” сафида деярли барча босқичларни босиб ўтди. Германия Кубогида ғолиб бўлди, бир неча марта чемпионликка ҳам яқин келди. Ройс жорий мавсум ҳам “Боруссия” билан бирга чемпионликни нишонлашга жуда яқин эди. Бироқ яна иккинчи ўрин билан чекланишга мажбур бўлди.