Nodirbek Abdusattorov Norway Chess—2023 2-turida norvegiyalik shaxmatchini mag‘lub etdi

Shaxmat bo‘yicha Norway Chess—2023 musobaqasining 2-tur o‘yinlari 31-may, chorshanba kuni o‘tkazildi.

O‘zbekistonlik grossmeyster Nodirbek Abdusattorov 2-turda Norvegiya vakili Aryan Tariga qarshi bahs olib bordi va g‘alabaga erishdi.

Dastlabki turda Nodirbek Anish Giriga qarshi dona surgandi. Asosiy partiya durang bilan yakun topgan, armageddon bahsida esa Abdusattorov mag‘lubiyatga uchragandi.

O‘zbekiston vakili ikki turdan keyin 4 ochko to‘plagan holda Hikaru Nakamura bilan birga 2-o‘rinda bormoqda. Peshqadam Fabiano Karuana hisobida 4,5 ochko bor.

Abdusattorov navbatdagi bellashuvni Alireza Firuzjaga qarshi o‘tkazadi. Partiya 1-iyun kuni bo‘lib o‘tadi.

Nodirbek musobaqaning dastlabki kunida o‘tkazilgan blits bahslarida g‘alaba qozongandi.

Ma’lumot uchun, partiyada g‘olib chiqqan shaxmatchi 3 ochkoga ega bo‘ladi, mag‘lub esa — 0. Agar o‘yin durang bilan yakunlansa, armageddon bahsi o‘tkaziladi. Unda g‘alaba qozonganga 1,5 ochko, yutqazgan shaxmatchiga esa 0,5 ochko beriladi. Armageddon qoidalariga ko‘ra, partiyada durang bo‘lsa, qora donada o‘ynagan shaxmatchi g‘olib deb topiladi.