“Голланд эчкиларининг бир литр сутини 16 минг сўмдан сотамиз”. Андижонлик тадбиркор 8 литргача сут берадиган заанен зотли эчкилар ҳақида

Тошкент вилояти Бўстонлиқ туманида 27 май куни Ўзбекистонда илк бор наслли эчкилар кўргазмаси бўлиб ўтди. Кўргазма жараёнида республиканинг турли ҳудудларидан келган чорвадорлар наслли, қимматбаҳо эчки зотлари билан қатнашди, ўзаро тажриба алмашди, дея хабар бермоқда “Дарё” мухбири.

Андижон вилояти Олтинкўл туманидаги фермер хўжалиги ветеринари Шодмонали Қўчқоровнинг айтишича, заанен эчкиси бир кунда 4—8 литр сут беради.

“Кўргазмага Голландиянинг заанен зотли эчкиларини олиб келдик. Сут йўналишида фаолият олиб борамиз. Аҳоли учун сифатли пишлоқ, йогурт каби маҳсулотлар ишлаб чиқарамиз. Ҳозирда бу наслнинг болаларини фуқароларга тарқатиб ҳам беряпмиз. Ўртача 4 литрдан 8 литргача сут беради. Ёғли сутнинг бир литрини 16 минг сўмдан сотамиз”, — дейди у.

Чорвадорнинг таъкидлашича, ушбу эчки Ўзбекистон иқлимига мослашувчан.

“Зааненнинг Ўзбекистон шароитига мослашувчанлиги яхши, салқинроқ, ўртача ҳавода ўзини эркин ҳис қилади. Бу эчки жаҳон бозорида ўртача 500 долларга баҳоланади. Йўналишимиз сут бўлгани учун сутни қайта ишлаш мақсадида биз бир йилда бир марта болалатамиз, ўртача 1 тадан 3 тагача туғади”, — дея қўшимча қилди Шодмонали Қўчқоров.

Кўргазмада, шунингдек, бухоролик чорвадор Ашур Шаропов нархи 5 минг доллардан бошланиб, 20 минг долларгача борадиган эчкилари ҳақида тўхталиб, “Агар эчкиларни машинага қиёсласак, оддийлари Tico ёки Damas, англанубин эса Malibu ёки Captiva!”, — деб айтиб ўтган эди.