Самарқанд шаҳридаги Археология институти қаршисида қурилаётган бинонинг 7-қаватидан зинапоялар орасидан пастга тушиб кетган ишчи вафот этган. “Дарё” сўровига жавобан Самарқанд вилояти ИИБ ахборот хизмати раҳбари буни тасдиқлади.
Маълумотларга кўра, воқеа 6 май куни соат 08:00 ларда содир бўлган. Сувоқчилик ишлари билан шуғулланган қашқадарёлик Б.А. воқеа жойида вафот этган.
Ҳолат юзасидан Самарқанд шаҳар бўйича ИИО ФМБ ҳузуридаги тергов бўлими томонидан Жиноят кодексининг 257-моддаси (меҳнатни муҳофаза қилиш қоидаларини бузиш) 2-қисми “а” банди билан жиноят иши қўзғатилган.
2022 йил декабрда Россиянинг Санкт-Петербург шаҳри Петроградский туманида ўзбекистонлик ишчи 7-қаватдан тушиб кетиб, вафот этгани, шу йилнинг апрель ўрталарида эса Тошкент шаҳри Бектемир туманидаги 14 апрель куни 289-мактабда 11-синф ўқувчиси 3-қаватдан тушиб кетгани тўғрисида хабар берилганди.