Ўзбекистонда манфаатлар тўқнашувига йўл қўйганлик учун жавобгарлик чоралари белгиланмоқда

“Манфаатлар тўқнашуви тўғрисида”ги қонун сенаторлар томонидан маъқулланди. Бу ҳақда Олий Мажлис Сенати матбуот хизмати хабар берди.

Қонун билан Коррупцияга қарши курашиш агентлиги манфаатлар тўқнашувини тартибга солишда ваколатли орган сифатида белгиланмоқда.

Қонуннинг қўлланилиш доираси аниқлаштирилмоқда:

• давлат органларига ва маҳаллий давлат ҳокимияти органларига;
• давлат муассасаларига, давлат унитар корхоналарига;
• давлат мақсадли жамғармаларига;
• устав фондида давлат улуши 50 фоиз ва ундан ортиқ бўлган акциядорлик жамиятларига;
• ўз устав фондида давлат органлари ёки бошқа ташкилотларнинг улуши жами 50 фоиз миқдорда ва ундан ортиқ бўлган юридик шахсларга нисбатан татбиқ этилади.

Коррупцияга қарши курашиш агентлиги:

• манфаатлар тўқнашувига оид ҳолатлар аниқланганда битимни бекор қилиш, қарорни ҳамда бошқа ҳужжатни ўзгартириш ёки бекор қилиш тўғрисида давлат органларига ёки бошқа ташкилотларга тақдимнома киритади ёхуд уларни ҳақиқий эмас деб топиш ҳақида судга даъво киритади;
• манфаатлар тўқнашувини ҳисобга олиш реестри, мавжуд манфаатлар тўқнашуви тўғрисидаги хабарнома ҳамда эҳтимолий манфаатлар тўқнашуви тўғрисидаги декларациянинг намунавий шаклларини тасдиқлайди;
• мазкур инфографикада Агентликнинг манфаатлар тўқнашуви билан боғлиқ муносабатларни тартибга солиш соҳасидаги шу ва бошқа ваколатлари батафсил акс этган.

Шунингдек, манфаатлар тўқнашуви тўғрисидаги қонунчилик талабларини бузганлик учун жавобгарлик чоралари белгиланмоқда. Хусусан:

• манфаатлар тўқнашувини маълум қилмаслик ёки унинг тартибга солинмаганлиги учун интизомий ёки қонунчиликда белгиланган бошқа жавобгарликка тортиш учун асос бўлиши;
• манфаатлар тўқнашувига йўл қўйган ҳолда қабул қилинган қарорлар ва тузилган битимлар бекор қилиниши суд тартибида ҳақиқий эмас деб топилиши, шунингдек, ушбу қарорлар ҳақиқий эмас деб топилган тақдирда олинган фойда суд тартибида давлат даромадига ўтказилиши белгиланмоқда.

Қуйидагилар учун маъмурий жавобгарлик белгиланмоқда:

• давлат органи ходимларининг манфаатлар тўқнашуви ҳақида хабар бермаганлиги учун – БҲМнинг уч бараваридан беш бараваригача миқдорда жарима (такроран бўлса – БҲМнинг беш бараваридан ўн бараваригача);
• мансабдор шахсларининг ушбу вазиятни тартибга солмаганлиги учун – БҲМнинг беш бараваридан ўн бараваригача миқдорда жарима (такроран бўлса – БҲМнинг ўн бараваридан ўн беш бараваригача).

Бунда маъмурий баённома тузиш ваколати ушбу соҳадаги махсус ваколатли орган — Коррупцияга қарши курашиш агентлиги зиммасига юклатилмоқда.

Январь охирларида Transparency International халқаро нодавлат ташкилоти томонидан Коррупцияни қабул қилиш индекси 2022 йил натижалари эълон қилинганди. 180 та давлат орасида Ўзбекистон 31 балл билан 126-ўринни эгаллади. Мамлакат балларини 3 тага ошириб, ўрнини 14 поғонага яхшилашга (2021 йилда 140 ўрин) муваффақ бўлган. Май ойида эса Ўзбекистонда давлат органлари ва ташкилотлари, шу жумладан, маҳаллий ижро этувчи ҳокимият органлари фаолиятидаги коррупциявий хавф-хатарлар баҳолашдан ўтказилган эди.