“Ўзгидромет” ёзнинг биринчи ойида қандай об-ҳаво кутилаётгани ҳақида маълумот берди.
Сўнгги вақтларда аҳоли орасида 2023 йилги ёз фасли ҳам аномал (ғайритабиий) иссиқ, барча кузатув йиллари учун энг иссиқ бўлади деган маълумотлар пайдо бўлди, ҳудуд учун умуман тўғри келмайдиган ҳарорат қийматлари айтилди. “Ўзгидромет”га кўра, бундай маълумотлар, одатда, ҳеч қандай илмий асосга эга эмас. Метеорология фани бир вақтнинг ўзида бир неча ой олдин ҳарорат фонини прогноз қила олмайди.
Мутахассисларга кўра, бугунги кунда юқори аниқлик билан фақат июнь — ёзнинг биринчи ойи ҳақида гапириш мумкин. 2023 йилнинг июни ўртача иссиқ об-ҳаво билан бошланади. Ойнинг энг бошида ҳаво ҳарорати 34-37 даража атрофида бўлади. Иккинчи беш кунликда иссиқ 37-40 даражагача, жанубда ва чўл ҳудудларда 40-43 даражагача кўтарилади ва бундай ҳарорат иккинчи ўн кунликнинг бошигача сақланиб туради.
Биринчи ўн кунлик давомида Ўзбекистон ҳудудининг катта қисмида қуруқ об-ҳаво бўлиши кутилмоқда, фақат тоғли ҳудудларда айрим кунларда маҳаллий момақалдироқли ёмғирлар ёғиши мумкин.
Июнь ойининг иккинчи ва учинчи ўн кунликларида иссиқ қисқа муддатга бир оз кучсизланиш даврлари билан ҳарорат, асосан, 36-39 даража, республика шимолида, жанубида ва чўл ҳудудларида 42 даража атрофида бўлади.
Умуман олганда, июнь ойи ҳарорат меъёрдан 2-3 даража юқорироқ бўлади. Айрим кунларда баъзи жойларда бир оз қисқа муддатли ёмғир ёғиши мумкин. Ушбу ойда ёғингарчилик миқдори меъёрдан кам бўлиши кутилмоқда.
“Июль ва август ойлари учун об-ҳаво прогнозлари фақат эҳтимоллик шаклида тузилиши мумкин — бу узоқ муддатли прогнозларга энг тўғри ва аниқ ёндашувдир. Июль ва август ойларида 60-70 фоиз эҳтимоллик билан ҳарорат фони меъёрдан бир оз юқори ва унинг атрофида бўлиши кутилмоқда.
Ёзда аномал иссиқ бўлмайди, бироқ ҳароратни 40-42 даражагача, республиканинг шимолий, жанубий ва чўл ҳудудларида 43-45 даражагача кўтарилиб, жуда иссиқ об-ҳавонинг айрим даврлари ҳам истисно қилинмайди. Бу Ўрта Осиё иқлимининг хусусиятларидан биридир”, — дейилади “Ўзгидромет” хабарида.
Изоҳ (0)